MEYA WA HALMASHAURI YA MANISPAA YA KIBAHA DK NICAS MAWAZO AMEKIPONGEZA KIWANDA CHA U-FRESH KWA KUTOA MABATI 500 KWA SEKONDARI YA MWAMBISI

MEYA wa Halmashauri ya Manispaa ya Kibaha Dk Nicas Mawazo amekipongeza kiwanda cha U-fresh Food Ltd kwa kuchangia mabati 500 kwa ajili ya ujenzi wa Shule ya Sekondari Mwambisi.

Mawazo ameyasema hayo alipotembelea kiwanda hicho kinachozalisha Juisi na kuwa serikali inaunga mkono wadau kusaidia miradi ya maendeleo kwenye maeno walipowekeza.

Amesema kuwa wawekezaji lazima warejeshe kwa wananchi kupitia miradi ya maendeleo ambayo ina faida kwa jamii na hiyo ni manufaa ya uwekezaji hapa nchini.

"Tunawapongeza kwa kujitolea kuisaidia jamii kwani imekuwa ikishirikiana na wawekezaji ambao wako jirani na hayo ndiyo manufaa ya uwekezaji katika suala la maendeleo,"amesema Mawazo.

Aidha amesema kuwa ujenzi wa bweni kwenye shule hiyo ni kilio cha wazazi kwa watoto wao hivyo wadau wanapaswa kusaidia jitihada za serikali kwa kujitolea kusaidia jitihada hizo.

Naye Ofisa Utumishi wa kiwanda hicho Dalama Mohamed amesema kuwa watatoa mabati hayo ili kuunga mkono serikali kwenye sekta hiyo ya elimu ili kufanikisha upatikanaji wa mazingira bora ya elimu

Kwa upande wake Mthibiti Ubora wa kiwanda hicho Noela Ngusa amesema kuwa kipindi cha nyuma kulikuwa na changamoto juu ya maji yanayotoka kiwandani hapo lakini kwa sasa wamedhibiti hali hiyo kwani maji wanayatibu hivyo hayana madhara tena.

KIWANDA CHA QOUNQUER KUTOA MIFUKO 100 YA SARUJI UJENZI WA BWENI MWAMBISI SEKONDARI

KIWANDA cha Qounquer Investment Company Ltd cha Kibaha kimetoa mifuko 100 ya Saruji kwa ajili ya ujenzi wa Bweni la Shule ya Sekondari Mwambisi Kongowe.

Akitoa shukrani Meya wa Halmashauri ya Manispaa ya Kibaha Dk Nicas Mawazo aliyetembelea kiwanda hicho amesema kuwa saruji hiyo itasaidia ujenzi wa bweni hilo ambalo litakuwa mkombozi kwa wanafunzi wa shule hiyo.

Mawazo amesema kuwa wanafunzi wengi wa shule hiyo wanaishi mbali hivyo kuwa na changamoto mbalimbali wakati wa kwenda shule au wakirudi nyumbani.

"Wawekezaji wanapaswa kuichangia jamii katika masuala mbalimbali ya maendeleo  kwani hapa wanaunga mkono serikali kwenye sekta ya elimu hivyo kuwawezesha wanafunzi kupata elimu kwenye mazingira rafiki,"amesema Mawazo.

Amesema kuwa sheria inawataka wawekezaji kutenga fedha kwa ajili ya kusaidia shughuli za maendeleo kwa jamii inayozunguka uwekezaji uliopo.

Kwa upande wake Ofisa Masoko na Mahusiano wa kiwanda hicho kinachojihusisha na utengenezaji wa Tishu Robert Bakley amesema kuwa wameamua kuunga mkono serikali ili kuboresha ushirikiano uliopo.

Bakley amesema kuwa wataendelea kushirikiana na serikali na kwa changamoto ambazo zimesemwa na wananchi jirani na kiwanda hicho watazirekebisha baada ya wiki moja.

Amesema kuwa pia wataachana na matumizi ya kuni na kutumia nishati safi ili kuunga mkono jitihada za serikali za kutaka matumizi ya nishati safi.

Naye moja ya wananchi waliojirani na kiwanda hicho Samwel Raphael amesema kuwa kiwanda hicho kinapaswa kuweka mifumo mizuri ya maji ili kuepukana na adha ya maji yanayotoka kiwandani hapo yasilete athari.

Saada Almas amesema kuwa kutokana na changamoto za maji yanayotoka kiwandani hapo lazima kiwanda kichukue hatua kurekebisha hali hiyo.

MEYA WA HALMASHAURI YA MANISPAA YA KIBAHA DK NICAS MAWAZO ATAKA UJENZI SOKO LA KISASA LA LOLIONDO UKAMILIKE KWA WAKATI

HALMASHAURI ya Manispaa ya Kibaha imemtaka Mkandarasi wa ujenzi wa soko la Loliondo kukamilisha ujenzi huo kwa wakati ili wafanyabiashara waweze kufanya biashara zao kwenye mazingira mazuri.

Hayo yamesemwa na Mstahiki Meya wa Manispaa ya Kibaha Dk Nicas Mawazo alipotembelea kukagua maendeleo ya ujenzi wa soko  hilo linalotarajiwa kukamilika Februari mwaka 2027.

Mawazo amesema kuwa mradi unaotekelezwa chini ya Mpango wa TACTIC hadi sasa umefikia asilimia 45 litachukua wafanyabiashara zaidi ya 1,500 mara litakapokamilika.

"Soko hili ni matumaini makubwa kwa wafanyabiashara wetu wa Loliondo na soko ambalo linaenda kuwa kubwa na la kisasa na kupitia mradi wa TACTIC na Rais wetu Dk Samia Suluhu Hasaan ametuletea mkombozi,"amesema Mawazo.

Mhandisi Mshauri Emanuel Mahimbo amesema kwa sasa wanamsimamia vizuri mkandarasi huyo ikiwemo kupokea ushauri na kwa makunaliano waliyowekeana ifikapo Februari 2027 watakuwa wameshaukamilisha mradi huo.

Mahimbo amesema hakuna changamoto yoyote kwani malipo yanafanyika kwa wakati hivyo matarajio yao ni ujenzi kukamilika kwa muda uliopangwa.

Naye Meneja wa mradi huo Mhandisi Shaban Kaswaka amesema kuwa matarajio yao ni kukamilisha kwa wakati uliopangwa kama mkatana ulivyosainiwa na unatekelezwa na kampuni ya M/s Dimetoclasa Real Hope Limited.

Kaswaka amesema kuwa kuhusu mvua wamejiandaa vizuri kwa kuweka njia za maji hivyo hata mvua ikinyesha shughuli nyingine zitakuwa zikiendelea bila kuathiri ujenzi.

Mwenyekiti wa soko hilo Mohamed Mnembwe amesema kuwa wanamshukuru Rais Dk Samia Suluhu Hassan kwa kuwajengea soko kubwa na la kisasa.

Mnembwe amesema kuwa mradi huo utakapokamilika watakuwa kwenye mazingira mazuri na watahakikisha kila kitengo kinapata eneo lake la kufanyia biashara.

Mradi wa huo wa Tactic una thamani ya shilingi bilioni 19.8 ukihusisha ujenzi wa soko la kisasa la Loliondo ujenzi wa barabara za lami zenye urefu wa kilomita 4.8 bustani ya mapumziko na burudani na ujenzi wa jengo la usimamizi wa mradi.

MZABUNI WA USAFI SOKO LA LOLIONDO APEWA SIKU TATU SOKO LISIWE NA UCHAFU

MZABUNI wa usafi wa soko la Loliondo amepewa siku tatu kuhakikisha anaondoa uchafu uliopo sokoni hapo na kutoa takataka kwa wakati ili kuliweka soko hilo kwenye hali ya usafi.

Agizo hilo limetolewa na Mstahiki Meya wa Manispaa ya Kibaha Dk Nicas Mawazo alipotembelea soko hilo kusikiliza kero na changamoto za soko na kuzitatua.

Mawazo memwagiza mzabuni huyo Sosamy kuhakikisha soko hilo linakuwa safi na kuacha kurundika uchafu ambao unakaa muda mrefu na kuwa kero kwa wananchi wanaohudumiwa na soko hilo pamoja na wafanyabiashara hao.

Amesema kuwa amepata malalamiko kutoka kwa wafanyabiashara wa soko hilo kwani mzabuni huyo amekuwa akichelewesha kuondoa takataka kwa wakati hivyo anatoa siku tatu soko hilo lisiwe na uchafu ikiwa ni pamoja na kusafisha mitaro ya soko hilo.

Naye Mwenyekiti wa soko hilo Mohamed Mnembwe amesema kuwa wamekuwa wakimhimiza mzabuni huyo kutoa takataka kwa wakati lakini ameshindwa kutekeleza na kulundika takataka hivyo kusababisha kero sokoni hapo.

Nao baadhi ya wafanyabiashara Wastara Kilindo na Sheba Kalage wamesema kuwa uchafu huo unaozalishwa ni mwingi na unapaswa kutolewa kwa wakati ili kuondoa kero za uchafu.

Ziara hiyo ya Mstahiki Meya wa Manispaa ikiwa na lengo la kukagua miradi mbalimbali ya maendeleo ikiwemo ya usafi na barabara ili kukabilina na mvua za Elnino zinazotarajiwa kunyesha hivi karibuni.

KIWANDA KUONDOA KEMIKALI ILIYOSAMBAA KWENYE MAKAZI YA WATU

KIWANDA cha Lake chakubali kuondoa mabaki ya kemikali ya salfa inayolalamikiwa na wananchi kuleta athari za kiafya eneo la Matunda Mtaa wa Lulanzi Kata ya Picha ya Ndege Halmashauri ya Manispaa ya Kibaha.

Kiwanda hicho kiliridhia kuondoa mabaki hayo baada ya wananchi kulalamika wakati wa ziara ya Mstahiki Meya wa Manispaa ya Kibaha Dk Nicas Mawazo kutembelea kiwanda hicho ambacho kiko kwenye hatua za ujenzi.

Mawazo amesema kuwa ili kuepuka athari za kiafya ambazo zinaweza kujitokeza hasa katika kuelekea mvua kubwa za Elnino zinazotarajiwa kuanza kunyesha hivi karibuni kuna haja ya kiwanda hicho kutoa mabaki ya kemikali hizo hadi ifikapo Oktoba 17.

"Wananchi hapa wanalalamika kuwa kuna kemikali ambazo zina athari kiafya hivyo fanyeni kila njia kuziondoa ili zisilete madhara hasa wakati wa mvua ndipo zinaposambaa kwenye makazi ya wananchi,"amesema Mawazo.

Alisema serikali inahitaji uwekezaji lakini uzingatie afya za watu kwani endapo kemikali hizo zitaendekea kubaki hapo na kusambaa kwenye makazi ya watu zinaweza kuleta madhara makubwa kwa wananchi.

Moja ya wananchi wa eneo hilo la Matunda Yusuph Mohamed amesema kuwa kemikali hiyo imemwathiri kwani nyumba yake imepasuka migomba imekauka na ametoa taarifa kwa uongozi lakini hakuna msaada wowote.

Naye Frida Kitundu amesema kuwa hivi karibuni kiwanda hicho kilitoa kemikali hiyo lakini hawakuimaliza kwani ilikuwa nyingi sana na hutiririka hasa kipindi cha mvua na ni changamoto hasa kwa watoto ambao hucheza bila ya tahadhari.

Kitundu amesema ili kuwe na usalama waitoe kemikali hiyo kwa kuchimba na kuweka udongo mwingine pale watakapokuwa wameitoa na wasitiririshe maji toka kwenye kiwanda hicho bali wawe na mfumo wa kuyatibu maji.

Akijibu malalamiko hayo Msimamizi wa ulinzi wa kiwanda hicho cha Lake Rajab Masanja amesema kuwa watafanya itaratibu wa kuondoa mabaki hayo ya kemikali hiyo ili kuondoa changamoto hiyo.

Masanja amesema kuwa kemikali hiyo ilikuwa inatumika zamani lakini kwa sasa haipo tena na wamekuwa wakiitoa na watahakikisha hadi muda uliopangwa watakuwa wamekamilisha zoezi hilo.

 

KEDS YAPONGEZWA YATAKIWA KUSAFISHA MTARO SEHEMU ILIYOBAKI ILI KUKABILIANA NA MVUA ZA ELNINO

HALMASHAURI ya Manispaa ya Kibaha imekipongeza kiwanda cha KEDS kikichopo Picha ya Ndege kwa kutekeleza agizo la kusafisha mtaro wa maji yanayotoka kiwandani hapo na kuondoa kero ya majitaka kwenda kwenye makazi ya watu.

Aidha kimepongezwa kwa kuweza kutoa ajira kwa vijana wa Tanzania zaidi ya 500 ikiwa ni kuunga mkono juhudi za Rais Dk Samia Suluhu Hassan kuzalisha ajira kwa wananchi.

Akizungumza mara baada ya kutembelea kiwanda hicho kinachojihusisha na uzalishaji wa sabuni Mstahiki Meya wa Manispaa hiyo Dk Nicas Mawazo amesema kiwanda hicho kilikuwa kinatiririsha maji taka ambayo yalikuwa ni kero kwa wananchi wa eneo la Matunda Kata ya Picha ya Ndege.

Mawazo amesema kuwa kiwanda hicho kimetekeleza agizo walilopewa la kutakiwa kusafisha mtaro huo ili maji hayo yasiende kwenye makazi ya watu na kuondoa kero kwa wananchi na kuepusha athari za kiafya.

"Tunawapongeza kwa kutekeleza agizo mlilopewa tulipotembelea changamoto ilikuwa ni kubwa lakini tumeona kazi mliyoifanya hasa tukielekea kipindi cha mvua kubwa za Elnino pia tumeambiwa kuna eneo limebaki kama mita 300 fanyeni mpango msafishe na kuboresha ili mvua zikianza maji yapite na yasielekee kwenye makazi ya wananchi,"amesema Mawazo.

Katika hatua nyingine ameomba kiwanda hicho kisaidie ukarabati wa mabati ya Shule ya Msingi Lulanzi ambayo iko kwenye hali mbaya licha ya kuwa shule hiyo ni moja ya shule zinazoongoza kwa kuwa na ufaulu mkubwa kwenye Manispaa hiyo.

Mawazo amesema ni utaratibu wa kisheria wawekezaji kusaidia jamii ambayo iko jirani na uwekezaji hivyo waangalie namna ya kusaidia shule hiyo kwani mvua kubwa zitakaponyesha kunaweza kutokea changamoto kubwa ya usomaji kwa wanafunzi.

Naye Mwenyekiti wa Mtaa wa Lulanzi Thobias Shilole unakopita mtaro huo amesema kuwa mvua inaponyesha maji yamekuwa yakiingia kwenye makazi ya watu hivyo kwa kusafishwa mtaro huo kutasidia kuondoa changamoto hiyo.

Moja ya wananchi wa Mtaa huo Farid Hamis amesema kuwa eneo hilo lililobaki walisafishe kwani mvua kidogo ikinyesha maji yabaelekea kwenye nyumba zao hivyo hofu yao mvua za Elnino zikinyesha changamoto itakuwa kubwa sana.

Kwa upande wake Meneja Biashara wa kiwanda hicho Derick Doedatus amesema kuwa eneo lililobaki kusafishwa lilishindikana baada ya mmoja ya wananchi kugoma kuwa ardhi yake inapunguzwa kutokana na mtaro huo kutanuliwa ili maji yapite kwa urahisi hata hivyo watamalizia sehemu iliyobakia.

Deodatus amesema kuwa ombi la kusaidia Shule ya Msingi Lulanzi wamelichukua na kutaka uongozi wa shule hiyo kuandikia kiwanda ili kiweze kusaidia changamoto hiyo ya mabati.

MEYA DK MAWAZO ATOA SIKU SABA KIWANDA KUACHA KUTIRIRISHA MAJI MACHAFU KWENYE MAKAZI YA WATU

MSTAHIKI meya wa Manispaa ya Kibaha Dk Nicas Mawazo ametoa siku Saba Kwa kiwanda Cha Cordy kuhakikisha kinasitisha kutiririsha maji machafu kwenye makazi ya watu.

Ameyasema hayo Wakati wa ziara yake ya kutembelea viwanda kwenye Kata ya Picha ya Ndege ikiwa ni maandalizi ya kujikinga na athari za mvua za Elnino 

Mawazo amesema kuwa kiwanda hicho ambacho kiko kwenye Mtaa wa Picha ya Ndege kilitakiwa kitengeneze miundombinu ambayo itaepusha maji hayo kutiririka kwenye makazi ya wananchi ambapo maji hayo yanakemikali.

Kwa upande wake ofisa mazingira wa Halmashauri ya Manispaa ya Kibaha Bryson Mpogoza amesema kuwa tayari kiwanda hicho kilishapewa onyo na kupigwa faini lakini bado hakijatekeleza maagizo ya Ofisi yake.

Naye ofisa uajiri wa kiwanda cha Cordy Vicent Emanuel amesema kuwa wamepokea maagizo hayo na watatekeleza kuanzia siku ya Jumapili.

Naye Mkazi wa eneo kilichopo kiwanda hicho Sanura Amir amesema kuwa maji yayo yamekuwa kero kubwa na kuhofia kuathiri afya zao.