MABALOZI MTAA WA MACHINJIONI WATAKIWA KUTAMBUA WAGENI ILI KUDHIBITI UHALIFU.

MTAA wa Machinjioni Kata ya Tangini Wilayani Kibaha Mkoani Pwani umewataka mabalozi kuwatambua wageni wanaokwenda kuishi kwenye maeneo yao ili kudhibiti uhalifu.

Hayo yamesemwa na Mwenyekiti wa Mtaa huo Aidan Mchiwa alipokuwa akizingumza kwenye kikao cha wananchi na mabalozi juu ya kukabili vitendo vya uhalifu.

Mchiwa amesema kuwa baadhi ya wananchi wamelalamika kuongezeka vitendo vya uhalifu vinavyofanywa na baadhi ya vijana ambao wamekuwa wakitumia visu kupora watu.

"Tuna ulinzi Shirikishi ambao tuna uhuisha ila wakati tunachukua hatu hizi mabalozi wahakikishe wanawatambua wageni wanaoingia kwenye maeneo yao kwa kuwasajili ili kupata taarifa zao,"amesema Mchiwa.

Amesema kuwa baadhi ya watu hasa vijana wamekuwa wakiingia kwenye maeneo ya Mtaa lakini taarifa zao hazipo hivyo ni rahisi kufanya uhalifu.

"Wageni wakifahamika pia kuwa na daftari la wakazi litasaidia kukabiliana na wahalifu kwani watu wote ndani ya Mtaa watakuwa wanafahamika itakuwa ni sehemu mojawapo ya mbinu za kudhibiti uhalifu,"amesema Mchiwa.

Aidha amesema kuwa wazazi wanapaswa kuwalea watoto wao kwenye maadili mazuri ili wasijiingize kwenye makundi ya uhalifu kwani endapo watabainika hatua kali zitachukuliwa dhidi yao.

"Pia baadhi ya wazazi wamekuwa wakiwafumbia macho watoto wao ambao wamekuwa wakijihusisha na vitendo vya uvutaji bhangi na kusababisha kushiriki kwenye uhalifu,"amesema Mchiwa.

Naye Mkazi wa Mtaa huo Gasper Assey amesema kuwa kuwa na daftari la wakazi ambapo kutakuwa na taarifa za wananchi wote itasaidia kupunguza uhalifu kwenye Mtaa huo.

Assey amesema kuwa  hatua zichukuliwe kwa vijana ambao wanafahamika wanajihusisha na uhalifu na wazazi wasiwatetee watoto wao ambao ni wahalifu ndani ya Mtaa.

REMNANT YAICHAPA KIBAHA MC 2-0

REMNANT FC ya Machinjioni imeifunga timu ya Manispaa ya Kibaha bao 2-0 kwenye mashindano  ya Machinjioni Super Cup Season 1.

Mashindano hayo yanafanyika kwenye uwanja wa Bwawani Maili Moja Wilayani Kibaha Mkoani Pwani.

MBUNGE ACHANGIA 500,000 NA MATOFALI 2,000 UJENZI WA MABWENI SEKONDARI YA MWAMBISI

MBUNGE wa Jimbo la Kibaha Mjini Silvestry Koka ametoa kiasi cha shilingi 500,000 na matofali 2,000 kwa ajili ujenzi wa mabweni ya Shule ya Sekondari ya Mwambisi.

Koka alichangia ujenzi huo wakati wa mahafali ya 11 ya Shule ya Sekondari Mwambisi iliyopo Kata ya Kongowe Wilayani Kibaha.

Amesema kuwa ili wanafunzi waweze kupata masomo katika mazingira mazuri wadau wanapaswa kuchangia maendeleo ya elimu.

"Mchango uwe chachu ya kufanikisha ujenzi wa mabweni hayo ili wanafunzi wawe kwenye mazingira mazuri,"amesema Koka.

Kwa upande wake mkuu wa Shule ya Sekondari Mwambisi Philemon Fredy amesema kuwa wanashukuru mchango huo kwani utasaidia kuanza ujenzi wa mabweni ambayo tunatarajia kuyajenga.

Fredy amesema kuwa wanatarajia kuanza ujenzi hivi karibuni kwani baadhi ya vifaa tayari wanavyo kwa ajili ya kuanza ujenzi wa mabweni manne kwa ajili ya ujenzi.

Baadhi ya vitu vilivyochangwa ni tofali 2,500 saruji mifuko 33 hivyo kufanya michango yote kuwa na gharama ya shilingi milioni tatu huku bodi ya shule ikiahidi kutoa tofali 3,000.

MBUNGE KIBAHA MJINI KOKA ATOA MILIONI 10 UJENZI OFISI ZA MISIKITI MIWILI

MBUNGE wa Jimbo la Kibaha Mjini Silvestry Koka ametoa kiasi cha shilingi milioni 10 kwa ajili ya ofisi za Misikiti ya Kongowe na Ofisi ya Sheikh Mkuu wa Mkoa wa Pwani iliyopo Mwanalugali.

Koka ametoa fedha hizo wakati akitoa salamu za rambirambi kufuatia kifo cha Mariam Abdala mke wa Mwenyekiti wa Jumuiya ya Wazazi Wilaya ya Kibaha Mjini Yahaya Mtonda.

Amesema kuwa mahubiri ya Sheikh wa Mkoa Abbas Mtupa ya kutaka watu watoe sadaka kwa ajili ya kumrehemu mtu aliyekufa.

"Mahubiri yaliyotolewa na Sheikh ni muhimu sana tukayazingatia ili tujitengenezee hazina yetu ya baadaye kwani kujitoa kwa ajili ya imani ni jambo jema hivyo fedha hizo zitakwenda kila ofisi moja itapata milioni tano kumtolea sadaka marehemu,"amesema Koka.

Koka amesema kuwa anaungana na familia na waombolezaji kwa niaba ya ofisisi mbunge na kwaniaba ya wananchi wote anatoa pole kwa familia ya Mtonda na pole kwa Chama kwani yeye ni kiongozi na jambo kubwa ni kumuombea marehemu apumzike kwa amani 

Awali akitoa mawaidha Sheikh wa Mkoa wa Pwani Abbas Mtupa alisema kuwa Mungu Mungu kamkirimu Mtonda jambo zito kwani ni mtihani mkubwa na anapaswa kuukubali kwani Mungu kalipanga ila anapaswa kumshukuru.

Mtupa amesema kuwa baadhi ya waumini wanapopata mtihani au tatizo kama hilo hutaka kuishi kwenye ukapera lakini akiamini kuwa limepangwa na Mungu anapaswa kurudi kwenye maelekezo ya mungu. 

Kwa upande wake Mstahiki Meya wa Manispaa ya Kibaha Dk Nicas Mawazo alisema kuwa jambo hilo ni zito na halizoeleki hivyo waendelee kushirikiana na familia na utaratibu wa rambirambi za madiwani na watumishi wa Halmashauri utaandaliwa baadaye.

Akitoa salamu za familia na Wilaya ya Kibaha Sheikh Said Mtonda amesema wanashukuru kwa niaba ya familia kwa yote yaliyotokea kwa ni mpango wa Mungu 

WANANCHI PWANI KUNUFAIKA NA HUDUMA ZA AFYA ZA KIBINGWA NA BOBEZI

MKUU wa Mkoa wa Pwani Stanslaus Nyongo amewataka wananchi kujitokeza kwa wingi kunufaika na kambi ya huduma za afya za kibingwa na bobezi itakayofanyika katika Hospitali ya Rufaa ya Mkoa wa Pwani – Tumbi, kuanzia Novemba 16 hadi 20, 2026.

Akizungumza na waandishi wa habari Novemba 11, 2026, Mkuu wa Mkoa wa Pwani, Mhe. Stanslaus Nyongo, amesema kambi hiyo itatoa huduma za uchunguzi, ushauri, matibabu na upasuaji katika maeneo mbalimbali, ikiwemo magonjwa ya moyo, macho, figo, kisukari, saratani, mifupa, afya ya akili, watoto na magonjwa mengine.

Amesema baadhi ya huduma zitatolewa bila malipo, ikiwemo upimaji wa sukari, uchunguzi wa homa ya ini na upasuaji wa mtoto wa jicho. Aidha, bima zote za afya zitakubaliwa, huku huduma nyingine zikitolewa kwa gharama nafuu zilizowekwa na Serikali.

Nyongo amewahimiza wananchi kujitokeza katika hospitali hiyo kuanzia saa 2:00 asubuhi hadi saa 10:00 jioni. Kambi hiyo itahusisha madaktari bingwa na wabobezi kutoka mikoa ya Iringa, Singida, Morogoro, Pwani na Dodoma, pamoja na Hospitali ya Taifa Muhimbili.

               

mwisho.

MRADI KUWAWEZESHA WASICHANA WANAWAKE VIJANA KIBAHA WAZINDULIWA

MAKUNDI ya wasichana na wanawake vijana wenye umri wa miaka 18 hadi 35 katika Manispaa ya Kibaha, Mkoa wa Pwani, na maeneo ya jirani wanatarajiwa kunufaika na mradi wa mwaka mmoja wa uwezeshaji kiuchumi unaolenga kukuza ajira, kujitambua na tija kwa jamii.

Mradi huo  ujulikanao kama ' Girls Round Table- Season 12',  utatekelezwa kwa pamoja na  shirka lisilo la lissrikali la  Nuruyetu Foundation na Serikali kupitia Idara ya Maendeleo ya Jamii na mamlaka za serikali za mitaa katika maeneo ya mradi.

Akizungumza wakati wa uzinduzi katika Shule ya Msingi Sofu, Manispaa ya Kibaha hivi karibuni, Afisa Mtendaji wa Kata ya Sofu, Bi Aloysia Nyeto, alisema mradi huo unatarajiwa kubadilisha maisha ya wasichana na wanawake vijana ambao wamepoteza mwelekeo wa maisha, huku pia ukijenga uwezo wa jamii katika masuala mbalimbali ya maendeleo.

“Mradi huu utawafikia wasichana wetu na mabinti zetu, wengi wao waliokosa fursa za kufikia ndoto zao. Sambamba na hilo, jamii ambazo walengwa hawa wanatoka pia zitanufaika kwa namna moja ama nyingine kupitia programu za mradi huu. Tunashukuru sana Serikali kwa kutoa vibali kwa wadau mbalimbali wa maendeleo kufanya kazi na makundi mbalimbali ya watu katika maeneo yetu, na hii inaonesha dhahiri dhana ya utekelezaji wa malengo ya Dira ya 2050,” alisema.

Aliongeza kuwa, kupitia uwezeshaji wa kiuwezo na mtaji utakaotolewa kupitia mradi huo kwa walengwa hao, jamii katika maeneo husika zitajifunza umuhimu wa kuyajali makundi ya wanawake na wasichana kwa faida ya familia na jamii nzima.

Kwa upande wake, Mkurugenzi wa  Nuruyetu Foundation, Bi Zauja Mohamed, alisema wanawake vijana na wasichana kutoka maeneo ya Picha ya Ndege, Kwamfipa, Visiga na Sofu watanufaika katika awamu ya kwanza ya mradi huo, ambao unafadhiliwa kwa pamoja na Global Affairs Canada na Cuso International.

Akifafanua mradi huo, alisema walengwa watapata fursa ya kujifunza ujuzi wa kidijitali na fedha, utengenezaji wa kazi za mikono na ujuzi wa ujasiriamali.

“Tutaendelea kutafuta fursa mbalimbali kwa walengwa wa mradi huu kadri muda unavyokwenda. Lengo ni kuwawezesha kunufaika kulingana na uwezo wao wa kutumia ujuzi watakaoujifunza,” alisema.

Aliongeza kuwa mwishoni mwa mradi, walengwa watapewa vifaa vya kuanzishia biashara ili kuanzisha biashara zao wenyewe.

Alisema shirika hilo pia litaunga mkono Serikali katika kuimarisha masomo ya ufundi stadi kwa wasichana katika mikoa ya Pwani na Dar es Salaam, kama sehemu ya mradi huo.

Wakizungumza kwa niaba ya walengwa wengine, Olpa George wa Visiga na Rahma Hatibu wa Picha ya Ndege wote walionyesha matarajio makubwa ya mafanikio watakayoyapata kupitia mradi huo.

WANANCHI wametakiwa kuacha kuharibu noti kwani endapo wakikutwa na hatia adhabu yake ni faini ya shilingi 500,000 kwa noti moja au kifungo cha mwaka mmoja jela.

Aidha alisema kuwa kwa mtu atakayebainika kutengeneza noti bandia akibainika kifungo chake ni cha maisha jela na vifaa vyote vilivyotumika kuzitengeneza vitataifishwa.

Hayo yalisemwa Jijini Dar es Salaam na Ofisa kutoka Kurugenzi ya usimamizi wa Sarafu kutoka Benki Kuu (BoT) Shedrack Mapunda alipokuwa akielezea kuhusu utambuzi wa alama za usalama katika noti na utunzaji bora wa noti wakati wa mafunzo ya waandishi wa habari juu ya uchumi na fedha.

Mapunda alisema kuwa baadhi ya watu hawafahamu sheria za fedha kuwa haziruhusu uharibifu wa sarafu kwani hilo ni kosa kisheria na adhabu zipo.

"Endapo utabainika umeharibu noti utachukuliwa hatua za kisheria na ukibainika utafikishwa mahakamani kwani ukikutwa na hatia kila noti moja iliyoharibiwa adhabu yake ni 500,000 au jela mwaka mmoja,"alisema Mapunda.  

Alisema kwa mtu ambaye atakutwa na hatia kwa ya kukutwa na noti bandia sheria inambana na anaweza kufungwa kifungo cha miaka saba jela hivyo umakini unahitajika.

"Wananchi wanapaswa kutoharibu noti kwani sheria zipo lakini kwa sasa wamejikita kutoa elimu zaidi lakini baadaye wataanza kutumia sheria hizo ili kudhibiti wale wanaoharibu noti na unapokutwa ba noti bandia huwezi kusema hukufahamu .

Alisema kuwa wananchi anapaswa kutunza noti na kutoharibu kwani hilo ni kosa kisheria kwani kuna baadhi wanazikanyaga au kuzikata au kutumia kwa njia ambayo siyo sahihi.

Kwa upande wake Meneja Msaidizi wa Idara ya Mawasiliano BoT Noves Moses alisema kuwa baadhi ya watu wamekuwa wakitumia noti kutengeneza mataji wakati wa sherehe.

Moses alisema kuwa baadhi ya watu wamekuwa wakitengeneza kadi kwa noti jambo ambalo ni kinyume cha sheria hivyo jamii inapaswa kupewa elimu juu ya matumizi mabaya noti kwani nikosa kisheria.