WATATU WAFA BAADA YA BOTI KUZAMA MTO RUFIJI

WATU watatu wamefariki dunia na wengine wawili hawajulikani walipo baada ya boti waliyokuwa wakisafiria kuzama baada ya kugonga gogo kwenye Mto Rufiji.

Kwa mujibu wa Kamanda wa Polisi Mkoa wa Kipolisi Rufiji Kamishna Msaidizi Mwandamizi wa Polisi (SACP) Protas Mutayoba amesema kuwa ajali hiyo ilitokea Novemba 4 majira ya saa 12 jioni katika eneo la Kijiji cha Mloka Kata ya Mwaseni.

Mutayoba amesema kuwa boti hiyo mali ya Kijiji cha Mloka ilikuwa ikiendeshwa na Nassoro Mkandu (32) mkazi wa Mloka ikiwa na watu 23 waliokuwa wakitoka mashambani kuelekea Kijijini kupitia Mto Rufiji ambapo boti hiyo ilikuwa imebeba watu 23 ambapo watu 18 waliokolewa.

Mutayoba amewataja waliofariki kuwa ni Sikitiko Naimbu zaidi ya miaka (60) Shushani Kitimai (2) na Masha Buriani (17) wakazi wa Mloka huku Faimu Kitimai (6) pamoja na Nusra Makuka (28) ambao hawajulikani walipo.

"Kati ya watu 18 waliookolewa watatu ni wanaume na 15 wanawake ambao wanaendelea na matibabu katika Zahanati ya Mloka ambao watu wawili bado hawajapatikana,"amesema Mutayoba.      

Kwa upande wake Mkuu wa Wilaya ya Rufiji Luteni Kanali Fredrick Komba amesema kuwa ajali hiyo imeacha simanzi kwa wananchi huku shughuli za uokoaji zikiendelea na ufatiliaji katika Mto Rufiji.

MFANYAKAZI KITUO CHA MAFUTA AFA KWA KUSHAMBULIWA NA WATU WASIYO FAHAMIKA

MFANYAKAZI wa kituo cha kuuza mafuta cha Oryx Jimmy Lema (29) amepoteza maisha baada ya kushambuliwa na kitu chenye ncha kali maeneo mbalimbali ya mwili wake na watu wasiofahamika ambao walikimbia mara baada ya tukio hilo.

Hayo yamesemwa na Kamanda wa Polisi Mkoani Pwani Salim Morcase tukio hilo lilitokea majira ya saa 9:15 usiku Novemba 5 mwaka huu 2026 kwenye kituo cha kuuzia mafuta cha ORYX kilichopo eneo la Kibosha Kata ya Mapinga Wilaya ya Bagamoyo. 

Morcase amesema kuwa marehemu akiwa kazini zamu ya usiku pamoja mwenzake Junior Jonh katika kituo hicho cha kuuzia mafuta alikutwa na umauti baada ya kushambuliwa na watu hao ambao hawakuweza kufahamika.

"Baada ya kupungua kwa wateja majira ya saa 8:30 usiku marehemu alienda kujipumzisha katika moja ya vyumba vilivyopo kwenye kituo hicho lakini ghafla akiwa ndani ya chumba hicho alivamiwa na watu wasiofahamika,"amesema Mircase.

Amesema kuwa watu hao waliiingia ndani majira ya saa 9:00 usiku na kumshambulia na kitu cha ncha kali na kusababisha kifo chake.

"Kufuatia tukio hilo Jeshi la Polisi Mkoa wa Pwani limeanza msako mkali wa kuwasaka wahusika wa tukio hilo ili hatua za kisheria ziweze kuchukuliwa dhidi yao,"amesema Morcase.

MAMA MKUBWA NA WENZAKE WAWILI WASHIKILIWA TUHUMA KIFO CHA MTOTO BAADA YA KUMNYWESHA WANZUKI

WATU watatu wanashikiliwa na Jeshi la Polisi Mkoani Pwani akiwemo mama mkubwa wa mtoto mwenye umri wa miaka (3)  kwa tuhuma za kumpa pombe ya kienyeji aina ya wanzuki na kusababisha kifo.

Hayo yamesemwa na Kamanda wa Polisi Mkoa wa Pwani Salim Morcase alipokuwa akizungumza na waandishi wa habari ofisini kwake mjini Kibaha.

Morcase amesema kuwa tukio hilo lilitokea Oktoba 30 mwaka huu majira ya saa 5:00 asubuhi Kijiji cha Kwaruhombo Kata ya Mbwewe Wilaya ya Kipolisi Chalinze ambapo mtoto huyo akiwa na wenzake wawili walinyweshwa pombe ya kienyeji aina ya wanzuki wakiwa nyumbani kwao na mama yao mkubwa aitwaye Bahati Shabani (32).

"Mara baada ya kunywa pombe hiyo mtoto Mustapha Mubaraka alizidiwa na kukimbizwa katika Zahanati ya Kijiji cha Kwaruhombo

kutokana na hali yake kutokuwa nzuri mtoto huyo, alihamishiwa kutoka Zahanati ya Kwaruhombo,"amesema Morcase.

Amesema kuwa mtoto huyo alihamishiwa katika Hospitali ya Msoga kwa matibabu zaidi ambapo alifariki tarehe Oktoba 31 mwaka huu akiwa anaendelea na matibau katika Hospitali hiyo.

"Kufuatia tukio hilo Jeshi la Polisi Mkoa wa Pwani linamshikilia Bahati Shabani (32) mama mkubwa wa mtoto huyo na Rehema Gabriel (37) na Elizabeth Dibison (35) wote wa kazi wa Kijiji cha Kwaruhombo Kata ya Mbwewe ambao ni wauzaji wa pombe hiyo ili kubaini mazingira yaliyosababisha kifo cha mtoto huyo iwapo yalitokana na kunyweshwa pombe hiyo,"amesema Morcase.

MAMA WAKAMBO ASHIKILIWA TUHUMA KIFO CHA MTOTO

JESHI la Polisi Mkoani Pwani linamshikilia Irene Machumu (32) mama wa kambo kwa tuhuma za kumuua mtoto mwenye umri wa miaka (5) akidai amechezea maji yaliyokuwa yamewekwa kwenye beseni.

Kwa mujibu wa taarifa iliyotolewa kwa vyombo vya habari na Kamanda wa Polisi Mkoani Pwani Salim Morcase amesema kuwa tukio hilo limetokea huko Mtaa wa Msumbiji Wilaya ya Kisarawe Novemba 2 mwaka huu majira ya mchana.

Morcase amesema kuwa mtoto huyo alikuwa akiishi na baba yake na mama yake huyo wa kambo pamoja na pacha wa marehemu.

"Taarifa za awali zinaeleza kuwa mtuhumiwa anadaiwa kumwadhibu mtoto huyo kwa fimbo akimtuhumu kuchezea maji yaliyokuwa kwenye beseni akiwa yeye na pacha wake,"amesema Morcase.

Amesema kuwa kufuatia tukio hilo Jeshi la Polisi Mkoa wa Pwani linamshikilia Machumu kwa mahojiano huku uchunguzi wa tukio hilo ukiendelea.

"Tunachunguza tukio hili ili kuweza kubaini mazingira yaliyosababisha kifo cha mtoto huyo pamoja na chanzo cha kifo chake,"amesema Morcase.

Aidha amesema kuwa hatua zaidi za kisheria zitachukuliwa mara baada ya uchunguzi wa tukio hili kukamilika wa tukio hilo.

MALI ZA SEKTA YA FEDHA ZAFIKIA TRILIONI 10.9

SEKTA ya fedha nchini inaendelea kukua ambapo hadi kufikia Desemba mwaka 2025 jumla ya mali za mfumo wa fedha zimefikia takribani trilioni 10.9.

Hayo yamesemwa Jijini Dar es Salaam na Mkaguzi Mwandamizi wa Benki kutoka BoT Joel Charles wakati wa mafunzo kwa waandishi wa habari juu ya utendaji kazi wa Benki Kuu.

Charles amesema kuwa Benki Kuu ndiyo msimamizi wa taasisi za fedha na imekuwa ikihakikisha wateja wanalindwa.

"Sekta ya kibenki imewekeza asilimia 70 mifuko ya hifadhi ya jamii ni asilimia 23.6 mifuko ya uwekezaji wa pamoja asilimia nne na sekta ya bima ni asilimia 2.4,"amesema Charles.

SERA YA FEDHA NI NYENZO UKUAJI UCHUMI

SERA ya fedha ikitekelezwa vizuri  kwa kuzingatia matumizi bora ni moja ya nyenzo ambayo itasaidia kutekeleza miradi ya maendeleo kwa wananchi.

Hayo yamesemwa Jijini Dar es Salaam na Meneja Msaidizi Kurugenzi ya Sera za Uchumi na Utafiti BoT John Mero wakati wa mafunzo kwa waandishi wa habari juu ya habari za uchumi na fedha.

Mero amesema kuwa sera hizo kupitia sekta mbalimbali ambazo zinalenga maeneo maalum zikizingatiwa zitasaidia ukuaji wa uchumi na kuleta maendeleo

"Sera ya fedha ni kuhakikisha kunakuwa na utulivu wa mfumko wa bei hivyo ni vyema zikazingatiwa katika utekelezaji wake,"amesema Mero. 

BOT YAWATAKA WAANDISHI KUTOA TAARIFA SAHIHI ZA FEDHA NA UCHUMI

BENKI Kuu ya Tanzania (BOT) imewataka waandishi wa habari kutoa taarifa za fedha na uchumi kwa usahihi ili wananchi wapate uelewa juu ya masuala ya kifedha kwani ni sehemu ya maisha yao ya kila siku.

Hayo yamesemwa Jijini Dar es Salaam na Naibu Gavana wa Benki Kuu ya Tanzania (BoT) anayesimamia Utawala na Udhibiti wa Ndani Dk Rahma Mahfoudh wakati akifungua mafunzo kwa waandishi wa habari juu ya uelewa wa kazi na majukumu ya BoT.

Mahfoudh amesema kuwa wananchi wanapenda kuelewa juu ya masuala ya kiuchumi pamoja fedha kwani nao ni sehemu ya uchumi.

"Tumieni mafunzo haya ili muweze kuandika habari kwa weledi na kufanya uchambuzi ambao utamwezesha mwananchi kujua masuala ya kifedha,"amesema Mahfoudh.

Naye Meneja  wa Idara ya Mawasiliano wa BoT Vick Msina amesema kuwa wamekuwa wakishirikiana na waandishi wa habari kwa kipindi cha miaka zaidi ya 10.

Msina amesema kuwa ushirikiano huo ni pamoja na kuwapatia waandishi mafunzo kupitia Kanda mbalimbali ili kuwajengea uwezo waandishi watoe habari sahihi.