KIAMA KWA MADEREVA WANYWA VIROBA KIMEFIKA

 Na John Gagarini, Kibaha

HATIMAYE baada ya kilio cha muda mrefu cha abiria juu ya madereva ambao wamekuwa wakiweka pombe za viroba kwenye chupa za maji na kujifanya wanakunywa maji, kimesikika baada ya jeshi la polisi mkoani Pwani kupata vipima ulevi 100.

Akizungumza na waandishi wa habari mjini Kibaha kamanda wa kikosi cha usalama barabarani Nasoro Sisiwaya alisema kuwa vifaa hivyo vitasaidia kukabiliana na madereva walevi ambao wamekuwa wakisababisha ajali kutokana na ulevi.

Sisiwaya alisema kuwa kutokana na kero ya ulevi kuwa kubwa kwa baadhi ya madereva wamekuja na njia hiyo ili kuwadhibiti madereva hao ambao wamekuwa wakinywa pombe huku safari ikiendelea.

“Vifaa hivi vitatusaidia katika kukabiliana na madereva hao ambao ni chanzo kikubwa cha ajali kwani hupoteza umakini wakati wa kuendesha na kusababisha ajali ambazo zingeweza kuepukika,” alisema Sisiwaya.

Aidha alisema kuwa kitengo cha usalama barabarani kinaendelea kukabiliana na changamoto za ajali kwa kuweka askari mbalimbali wakiwemo ambao wanakuwa wamevaa kiraia ili kudhibiti madereva ambao wanakiuka sheria za usalama barabarani.

“Tunamshukuru Mungu kuwa ajali zinaendelea kupungua kutokana na udhibiti kuwa mkubwa ambapo kwa sasa makosa madogo yameongezeka ambayo yanaashiria kupungua kwa ajali katika mkoa,” alisema Sisiwaya.

Aliongeza kuwa kwa sasa wanashirikiana na mamlaka ya kudhibiti usafiri wa majini na nchi kavu (SUMATRA) katika kuwakamata madereva wanaovunja sheria ambapo mafanikio yameanza kuonekana kwani makosa makubwa ya barabarani yamepungua kwa asilimia 26.

Aliwataka wananchi na abiria kutoa taarifa mbalimbali kuhusiana na madereva ambao hawazingatii taratibu za uendeshaji wawapo barabarani na wataendelea kufanya operesheni za mara kwa mara ili kuwabaini madereva wazembe.

Mwisho.

  

MICHEZO PWANI

Na  John Gagarini, Kibaha

BONDIA wa Maili Moja Kibaha mkoani Pwani Nzumba Nkukwe leo Jumamosi anatarajia kupanda ulingoni kupambana na bondia Yusuph Yusuph wa Chalinze wilayani Bagamoyo.

Kwa mujibu wa katibu wa katibu wa chama cha ngumi mkoa wa Pwani Halfan Mrisho “Swagala” alisema kuwa pambano hilo litachezwa kwenye ukumbi wa Ndelema uliopo Chalinze.

Swagala alisema kuwa pambano hilo litakuwa ni la kirafiki kwa kuwapima uwezo wao mabondia hao pamoja na kuhamasisha watu kucheza mchezo huo mkoa Pwani.

“Lengo kuu ni kumwandaa Nkukwe ambaye anatakiwa kucheza mapambano 12 ili aweze kushiriki kwenye mashindano ya ubingwa hapa nchini,” alisema Swagala.

Aidha alisema kuwa pambano hilo lililodhaminiwa na Big Right litakuwa la raundi 12 na linatarajiwa kuwa na ushindani mkubwa kwa mabondia hao wa mkoa huu.

“Nawaomba mashabiki waje kwa wingi ili kuwahamasisha mabondia wa nyumbani na kutakuw ana usafiri kutokea Maili Moja hadi Chalinze hivyo itakuwa ni nafasi kwa wadau wa ngumi kujionea vipaji vya vijana wao,” alisema Swagala.

Alitoa shukrani kwa mdhamini wa mapambano Omary Kimbau kwa jitihada zake za kuhamasisha mchezo huo kwa vijana wa mkoa wa Pwani kwani amekuwa akiwaandalia mapambano mbalimbali mabondia.

Mwisho.

Na John Gagarini, Kibaha

MCHEZO wa nusu fainali kati ya Fire na Lisborn ulishindwa kutoa mshindi baada ya mwamuzi wa pambano hilo Hamad Mbegu kutimua mbio kuhofia usalama wake baada ya kumaliza mpira zikiwa zimesalia dakika chache zikiwa hazijatiamia dakika 90 na kuamuru yapigwe matuta timu hizo zikiwa sare ya 1-1.

Mchezo huo wa nusu fainali ya pili kuwania kombe la Kibaha Super Cup ulipigwa kwenye uwanja wa Bwawani Maili Moja wilayani Kibaha ulizikutanisha timu hizo ili kupata mshindi ambaye angeungana na Mwanalugali kucheza hatua ya fainali.

Chanzo cha mwamuzi huyo kukimbia ni pale alipoashiria mpira kwisha huku zikiwa bado dakika 5 kutimia dakikia 90 alimaliza pambano na kuashiria matuta lakini washabaiki wa timu ya Lisborn walimfuata na kumzonga huku wakimtishia kumpiga.

Kutokana na mzozo huo mwamuzi aliwaita wachezaji wa Lsborn kwa ajili ya kupiga matuta lakini walionekana kusuasua hali iliyofanya muda mwingi upotee karibu dakika 10 hivi huku washabiki wakiwa wamezingira eneo la goli zilipotakiwa kupigwa penati hali iliyomtia hufo mwamuzi huyo na kukimbia.

Mbali ya hali hiyo pambano hilo lilikuwa na mvutano mkubwa huku timu hizo zikionyesha kandanda safi na walikuwa Lisborn walioandaika bao la kuongoza kupitia kwa Kulwa Mwanda dakika ya 72 na Fundikira Fundikira wa Fire alisawazisha kwenye dakika ya 80 ya mchezo, mchezo huu utarudiwa leo Jumamosi kwenye uwanja huo huo.

Mwisho.

POLISI PWANI YAKUSANYA MAMILIONI

Na John Gagarini, Kibaha

JESHI la Polisi mkoani Pwani limefanikiwa kukusanya kiasi cha zaidi ya shilingi milioni 825 kutokana na makosa madogo madogo ya barabarani kwa kipindi cha miaka mitatu iliyopita.

Hayo yalisemwa jana na kamanda wa polisi mkoani humo Ulrich Matei alipoongea na waandishi wa habari mjini Kibaha kuzungumzia mafanikio na changamoto zinazolikabili jeshi hilo.

Matei alisema kuwa katika kipindi hicho jumla ya makosa yliyokamatwa katika kipindi cha Januari mwaka  2011 hadi Machi 2013 ni 31,663 ambapo yaliyolipiwa yalikuwa ni 31,235.

“Katika kipindi hicho ajali zilikuwa 942 za vifo zilikuwa 190 waliokufa walikuwa 224, ajali za majeruhi zilikuwa 510 na waliojeruhiwa walikuwa 1,109 ambapo inaonyesha kupungua kwa asilimia 25 ukilinganisha na mikoa mingine,” alisema Matei.

Kwa upande wake kamanda wa kikosi cha usalama barabarani Nasoro Sisiwaya alisema kuwa wanaendelea na mikakati mbalimbali ya kuzuia ajali ikiwa ni pamoja na kukamata magari mabovu.

Sisiwaya alisema kuwa wameunda vikosi maalumu viwili kwa ajili ya kukagua magari ambapo kimoja kinafanya ukaguzi kwenye barabara iendayo mikoa ya Kusini na kingine barabara ya Morogoro.

Aidha alisema kuwa wanakabiliwa na changamoto kubwa kuyaondoa magari yanayoharibika barabarani kwani hawana gari la kuyaondolea na matokeo yake hutumia magari mengine kuyaondoa kwa kutumia mnyororo mgumu.

Mwisho.     

12,500 KUNUFAIKA MIRADI YA MAJI KIBAHA

Na John Gagarini, Kibaha

JUMLA ya watu 12,500 kwenye vijiji vinne kwenye Halmashauri ya wilaya ya  Kibaha mkoani Pwani watanufaika  na mradi wa kitaifa wa maji wa Wami – Chalinze awamu ya pili wenye thamani ya zaidi ya shilingi bilioni tatu.

Akizungumza na waandishi wa habari ofisini kwake mjini Kibaha kuelezea mafanikio ya wilaya kwa kipindi cha miaka saba iliyopita mkuu wa wilaya Halima Kihemba alisema kuwa mradi huo utakamilika wakati wowote mwaka huu.

Kihemba alisema kuwa kwa sasa mradi huo umefikia asilimia 35 ya utekelezaji wake na kuvitaja vijiji hivyo kuwa ni Magindu, Lukenge, Gwata na Gumba.

“Mbali ya vijiji vilivyotajwa hapo juu pia tunatarajia jumla ya vijiji 45 vitanufaika na mradi mwingine ambao utasaidia kukabiliana na changamoto ya maji ambayo ni kubwa kwenye wilaya,” alisema Kihemba.

Aidha alisema kuwa kwa upande wa miradi hiyo yenye thamani ya zaidi ya shilingi zaidi ya bilioni mbili itategemeana na upatikanaji wa fedha kutoka wadau mbalimbali.

Ameitaja miradi hiyo kuwa ni mradi wa bomba Vikuruti, Boko Mnemela, Dutuni, bwawa la maji Mperamumbi uchimbaji wa kisima kirefu chenye uwezo wa kutoa lita 36,000 za maji kwa saa.

“Miradi hiyo itakuwa katika vijiji vya Lupunga, Mwabwito, Kisabi, Madimla, Disunyala na Makazi Mapya,” alisema Kihemba.

Ameongeza kuwa kwa upande wa Kibaha Mjini mitaa 15 ambayo ni Sofu, Muheza, Vikawe, Bondeni, Vikawe Shuleni, Kidenge, Galagaza, Sagale, Mikongeni, Mwanalugali, Saeni, Jonugha, Zogawale na Viziwaziwa miradi hii itakuwa na thamani ya zaidi ya shilingi bilioni moja.

Alibainisha kuwa changamoto kubwa ni pamoja na kutegemea vyanzo vya maji vya ya juu ya ardhi, mabwawa, mito ambayo hukauka wakati wa ukame na kusababisha shida ya maji hivyo kuweka mikakati ya kuhamasisha jamii kutunza vyanzo vya maji, kuandaa andiko la miradi ya maji ili kupata wafadhili na kutumia visima virefu kwa kuwa ni vyanzo vya uhakika zaidi kulinganisha na mabwawa.

Mwisho.

AMWUA MAMA YAKE MZAZI KWA KUMPIGA NA MCHI KICHWANI

JESHI la Polisi mkoani Pwani linamshikilia aitwaye Francis Siza  miaka (26) kwa tuhuma za kumuuwa mama yake mzazi Naomi Isaka (55)  kwa kumpiga na mchi kichwani.

 Akizungumza na waandishi wa habari mjini Kibaha kamanda wa polisi mkoani humo Ulrich Matei alisema kuwa tukio hilo lilitokea leo  majira ya saa 1:30 asubuhi eneo la Kiluvya A wilaya ya Kisarawe.

Kamanda Matei alisema kuwa kijana huyo alifanya tukio hilo baada ya kubaki yeye na mama yake baada ya wadogo zake wawili wa kike ambao ni wanafunzi kwenda shule.

“Alimpiga na mchi kichwani mara mbili uapande wa kushoto na kulia chanzo kikiwa ni kutaka kuuza kiwanja cha mama yake ambapo ni siku moja tangu arudi baada ya kusafiri kusikojulikana,” alisema Kamanda Matei.

Baadhi ya majirani ambao walishuhudia tukio hil Nolasko Zenobisi alisema wakati alipokuwa akiendelea na shughuli zake za kulima alisikia kelele zikipigwa ndipo alipokwenda katika nyumba hiyo na aliweza kukuta tayari mama huyo ameshafariki.

 Zenobisi alisema alipowajulisha majirani na kuanza kumtafuta mtuhumiwa na kwa bahati nzuri walimpata akiwa amijificha kichakani ndipo walipomfunga kamba na kumpeleka eneo alilofanyia tukio.

 Aidha alisema kwamba kijana huyo ambaye ndiye wa kwanza kuzaliwa katika familia yao alifanya tukio hilo la mauaji  baada ya   mdogo wake wa kike anaiyeitwa Neema Siza kuondoka nyumbani na kuelekea shule ya sekondari Makulenge ambapo ndipo anaposoma kidato cha tatu.

 Naye shuhuda mwingine ambaye akutaka jina lake litajwe gazeti alisema kwamba pia nay eye asubuhi hiyo alikuwa shambani anaalia ndipo aliposikia sauti na mtu anapika makelele na kufa na alipokwenda alimwona huyo kijana anakimbia mbio ndipo wananchi wengine walipoamua kumkimbiza na kumkamata.

 Hata hivyo baadhi ya majirani wengine walisema kwamba kijana huyo alifika mnamo April 14 majira ya saa 4:30 usiku na kumgongea mama yake mzazi na alifunguliwa na kuingia ndani kulala lakini asubuhi akaamua kufanya tukio hilo.

Naye mtoto wa Marehemu Neema Siza ambaye anasoma shule ya Makurunge alisema kwamba asubuhi aliondoka na kumwaga mama yake vizuri na  kwenda shule na kwamba nyumbani alimwacha kaka  yake huyo wa kwanza pamoja na  mama yake.

Kwa upande wake mtuhumiwa huyo alisema kuwa kwa upande wake yeye hakugombana wala hawakuwa na ugomvi wowote na mama yake mzazi isipokuwa alifanya hivyo baada ya kumwona mama yake mzazi anateseka hivyo akaona bora ampige na kumuuwa ili aweze kupumzika.

 “Lakini kutokana na kosa ambalo nimelifanya kwa sasa najuta, lakini ninafahamu kuwa sheria itachukua mkondo wake, ingawa mimi nimefanya hivyo kwa sabbau tangu siku nyingi niliona mama yangu anateseka sana, na ukizingatia baba yetu naye alishafariki dunia  kwa hiyo hali halisi ndiyo iliyofanya nifanye hivyo na hakuna kitu kingine,” alisema Siza.

WALIMU WA RIADHA KUPEWA MAFUNZO

Na John Gagarini, Kibaha

IDARA ya Elimu na chama cha Riadha mkoa wa Pwani (RP) vimeandaa mafunzo kwa walimu wa mchezo wa riadha kutoka mikoa 10 kuanzia Aprili 6 hadi 17 mwaka huu.

Akizungumza na waandishi wa habari mjini Kibaha mkufunzi wa chama cha Riadha Tanzania (RT) Robert Kalyahe alisema kuwa mafunzo yatakuwa ya siku 10 na yatafanyika kwenye uwanja wa Shirika la Elimu Kibaha –Tumbi.

Kalyahe alisema kuwa mafunzo hayo ya hatua ya kwanza yatasimamiwa na RT ambapo vyeti vya wahitimu vitatambuliwa na chama cha Riadha Duniani (IAAF).

“Washiriki watakuwa kutoka mikoa 10 walengwa zaidi wakiwa ni walimu wa shule za msingi, sekondari na wadau wengine wa mchezo huo sifa ikiwa ni elimu ya kidato cha nne na kuendelea,” alisema Kalyahe.

Alisema kuwa RT imeamua kushirikisha walimu zaidi kwani wao wana nafasi kubwa kuwaandaa wanafunzi shuleni na wakufunzi watakuwa ni Seleman Nyumbani, Samwel Tupa na yeye mwenyewe.

Kalyahe ambaye pia ni mjumbe wa kamati ya ufundi ya mkoa wa Pwani alisema kuwa hadi sasa ni wadau 26 wamejitokeza kushiriki mafunzo hayo na kuwataka wadau wengi zaidi kujitokeza kupata elimu hiyo ili waweze kuendeleza mchezo huo.

Mwisho.

    

WANAKIJIJI WATAKA MAKUBALIANO

Na John Gagarini, Kibaha

WAKAZI wa Kijiji cha Gama wilayani Bagamoyo mkoani Pwani wameitaka kampuni ya EcoEnergy ya Sweden inayotaka kuwekeza kilimo cha miwa kukaa pamoja ili kuingia makubaliano nao juu ya kuitumia ardhi yao  badala ya kuwatumia madalali wanaojifanya wanahusika na eneo hilo.

Wakizungumza Kijijini hapo jana kwenye mkutano wa hadhara uliaondaliwa na uongozi wa Chama Cha Mapinduzi (CCM) wilaya ya Bagamoyo.

Moja ya wakazi wa Kijiji hicho Ramadhan Alawi alisema kuwa wao wanachokitaka ni kukaa meza moja na wao na si kuwatumia watu wa kati ambao hawahusiki na kuwasemea kwani ardhi hiyo ni vema kukawa na maelewano ya namna nao watakavyonufaika.

“Sisi hatukatai wawekezaji lakini tunachokitaka wawekezaji hao waje tukae meza moja na kukubaliana namna ya jinsi na sisi tutakavyoshiriki katika uwekezaji huo na hutataki watu wa kutusemea kwani sisi wenyewe tupo,” alisema Alawi.

Kwa upande wake Salum Yusuph alisema kuwa tatizo kubwa hapa ni wananchi kutoshirikishwa katika suala zima la uwekezaji huo kwa wakazi wa Kijiji chao na hawajui wao watanufaika vipi kwani waliambiwa waondoke kwenye eneo hilo.

“Hapa tunataka sisi na EcoEnergy tukae pamoja tukubaliane hasa ikizingatiwa kuwa hapa hatuna shule, zahanati wala huduma za kijamii na tungependa tuwe kama mashamba mengine ya Mtibwa na Kagera tukae tulime miwa wao waje kununua kwetu na si kutuondoa,” alisema Yusuph.

Akizungumzia suala hilo msimamizi wa wakulima wadogo wadogo wa kampuni hiyo Ian Sherry alisema kuwa wao wana lengo la kuwekeza katika kijiji hicho kwa manufaa ya wananchi na hawana lengo baya kwani kwenye vijiji walivyowekeza kupitia mradi huo wamenufaika na kuboresha huduma za kijamii.

“Wakazi wa eneo hili wasiwe na wasiwasi kwani taratibu zinafuatwa na kama kuna matatizo mambo yote yatawekwa sawa ili kuhakikisha manufaa ya mradi huo ambao utakuwa na uwekezaji mkubwa unaofikia zaidi ya bilioni saba,” alisema Sherry.

Naye mwenyekiti wa CCM wilaya ya Bagamoyo Shaibu Mtawa alisema kuwa kutokana na changamoto ya madai ya wananchi wataandaa mkutano baina ya pande zote hizo ili kuondoa tofauti zilizojitokeza.

Mtawa alisema kuwa hapa inaonekana wananchi hawajashirikishwa kikamilifu juu ya uwekezaji huo hivyo chama kitahakikisha mgogoro uliopo unamalizwa na kesi iliyo mahakamani inaondolewa ili kuleta mwafaka.

Mwisho.