TAKUKURU PWANI YABAINI MIRADI KAMATI HEWA MIRADI YA HALMASHAURI

TAASISI ya Kuzuia na Kupambana na Rushwa (TAKUKURU) Mkoa wa Pwani imebaini uwepo wa kamati hewa kwenye baadhi ya miradi ya maendeleo inayosimamiwa na Halmashauri ya Wilaya ya Mkuranga

Hayo yalisemwa Mjini Kibaha na Mkuu wa Takukuru Mkoa huo Christopher Myava alipokuwa akizungumza na waandishi wa habari ofisini kwake.

Myava alisema kuwa kutokana na kamati hewa kunasababisha mianya ya rushwa katika malipo yanayofanyika.

"Pia tumebaini kuwa jamii kutokuwa na umiliki wa miradi hiyo kutokana na kutoshirikishwa katika utekelezaji wake mfano ujenzi wa kituo cha afya Kisiju ambapo jamii haikushirikishwa kabisa,"alisema Myava.

Alisema kuwa mradi mwingine ambao ulibainika kuwa na changamoto ni mzabuni aliyechaguliwa kupeleka vifaa vya ujenzi shule ya sekondari ya kata ya Shungubweni hakuomba kazi hiyo kwenye mfumo wa serikali wa TANEPS.

"Mzabuni huyo alipewa zabuni kinyume cha utaratibu na tukafanya kikao na Halmashauri kwa lengo la kuhakikisha waombaji wa zabuni wanashindanishwa ili kuondoa dhana ya utoaji zabuni kwa upendeleo,"alisema Myava.

Alibainisha mradi mwingine ni kwenye soko la Mnarani Halmashauri ya Mji Kibaha wakusanyaji wa ushuru kutotoa risiti za mashine EFD baada ya wafanyabiashara kufanya malipo kwa kisingizio cha ubovu wa mashine.

"Sababu nyingine wanasema kuwa eti mashine haina chaji hali ambayo imesababisha wakusanyaji kutumia fedha hizo kwa matumizi yao binafsi,"alisema Myava.

Aliongeza kuwa kutokana na hali hiyo kunakosekana kumbukumbu za wafanyabiashara waliofanya malipo hivyo kusababisha upotevu wa mapato.

"Maegesho ya magari nako kuna upotevu wa mapato unaosababishwa na utendaji mdogo wa kukusanya mapato ambapo baadhi ya wakusanyaji hutoza viwango tofauti vya ushuru kwa malori yanayoegeshwa sokoni tofauti na vilivyowekwa kwenye sheria ndogo,"alisema Myava.

Mkuu huyo wa Takukuru Mkoa wa Pwani alisema kuwa baada ya kubaini hayo walifanya kikao na wadau wa soko na kuweka maazimio ikiwa ni pamoja na kudai risiti, kutoa taarifa za ubovu wa mashine na kuweka vibao vinavyoonyesha tozo.

MKUU WA MKOA WA PWANI ABUBAKAR KUNENGE AZINDUA MPANGO WA UKUSANYAJI MAPATO

MKUU wa Mkoa wa Pwani Abubakar Kunenge amezitaka Halmashauri za Mkoa huo kushirikiana na Shirika la Maendeleo la Ujerumani (GIZ) ili wapatiwe mafunzo ya Mpango Mkakati wa Kuongeza  Mapato ambayo ndiyo dira ya Rais na TAMISEMI.

Kunenge aliyasema hayo Mlandizi wakati akizungumza na wataalamu mbalimbali na madiwani wa Halmashauri ya Wilaya ya Kibaha alipokuwa akifungua mafunzo ya namna ya kuongeza mapato kwenye Halmashauri kupitia mpango wa miaka mitano wa Mpango Mkakati wa Kuongeza Mapato kwa kipindi cha miaka mitano ijayo mafunzo yaliyoandaliwa GIZ.

Alisema kuwa upatikanaji wa mapato mengi kutasaidia utoaji wa huduma bora kwa wananchi kupitia miradi ya maendeleo na kupunguza kero kwa wananchi na hiyo itamsaidia Rais.

"Ifikie hatua Halmashauri zetu zitoe gawio kwa serikali kama ilivyo kwa mashirika ya umma ili kuisaidia ili iweze kuhudumia Watanzania hivyo wote kwenye miradi mikubwa ya nchi ikiwemo ile ya kimkakati kwa ajili ya maendeleo yetu,"alisema Kunenge.

Aidha alisema kuwa Halmashauri zishirikiane na GIZ ili kupata mafunzo hayo kwa lengo la kuongeza mapato pia watumie teknolojia ili kukusanya mapato ambapo mapato yakiongezeka itasaidia kuipa uwezo serikali kuhudumia wananchi wake.

"Tubuni vyanzo vipya vya mapato na tusitegemee kuuza ardhi tu peke yake kwani inakwisha tubuni vyanzo ambavyo ni endelevu hususani kwenye sekta ya uwekezaji ambayo ina nafasi kubwa ya kutuinua kiuchumi ili tuweze kuongeza mchango wetu kwenye uchumi,"alisema Kunenge.

Alibainisha kuwa Halmashauri ziangilie namna ya tozo ili zisiwe kero na kusababisha kuua au kukwamisha uwekezaji ambapo mapato ni takwimu kwa kujua wanaostahili kulipa ili mkusanye kwa mujibu wa sheria. 

Kwa upande wake Kaimu Katibu Tawala Mkoa George Nsajigwa Mpango Mkakati huo wa Kuongeza Mapato kwa Halmashauri hapa nchini uko kwenye mikoa ya Arusha, Tanga, Pwani ambapo ndo mkoa wa kwanza kufanya mafunzo hayo.

Naye Mkuu wa Wilaya ya Kibaha Nickson John alisema kuwa mafunzo hayo ni muhimu sana ambapo malengo yao kwa Halmashauri ya Kibaha Mji ni kufikia makusanyo ya shilingi bilioni 30 na Halmashauri ya Wilaya ya Kibaha kukusanya bilioni 20 katika kipindi cha miaka mitano.

John alisema kuwa ili kufikia malengo hayo wameamua kuwa na mafunzo ili kuwa na mipango ya kisayansi katika ukusanyaji wa mapato pia kuanzisha vyanzo vipya vya mapato ambavyo wanaamini vitawafikisha huko.

Naye Mkurugenzi wa Halmashauri ya Wilaya ya Kibaha Butamo Ndalahwa alisema kuwa mafunzo hayo yatawasaidia kupata mbinu mpya za ukusanyaji wa mapato ambapo kwa mwaka jana Halmashauri hiyo iliongoza kwa ukusanyaji mapato.

Naye mwezeshaji wa mafunzo hayo Peter Laizer mshauri wa mradi wa utawala bora wa fedha kutoka shirika hilo alisema kuwa mafunzo hayo yatawahusisha wataalamu wa masuala ya fedha kwenye Halmashauri kushirikiana na vitengo vingine.

WAKULIMA WATAKIWA KUTUMIA MBEGU ZILIZOTHIBITISHWA NA WAKALA WA MBEGU (TOSCI)

Taasisi ya Kuthibiti Ubora wa Mbegu Tanzania (TOSCI) imewataka wakulima na jamii kwa ujumla watumie Mbegu zilizothibitishwa ili kuongeza mavuno tija na kipato.

Hayo amesemwa Mkurugezi mkuu wa Taasisi ya Kuthibiti Ubora wa Mbegu Tanzania Patrick Ngwediagi  Wakati akizungumza na waandishi wa habari jijini dodoma kuhusu utekelezaji wa majukumu ya mwaka wa fedha 2022/2023 na mwelekeo wa utekelezaji wa bajeti ya mwaka 2023/2024 ya taasisi hiyo.

Amesema kuwa zaidi ya shilingi bilioni 12 zimetengwa kwa mwaka wa fedha 2023/2024 kwa ajili ya kuendelea na uboreshaji wa shughuli za uthibiti na usimamizi wa ubora wa mbegu pamoja na utekelezaji mradi wa kuendeleza sekta ya kilimo na uvuvi ( AFDP) kwa kujenga Maabara ya Mbegu.

Aidha amesema kuwa jukumu kubwa la Taasisi hiyo ni kusimamia shughuli za uzalishaji wa Mbegu na biashara ya Mbegu Ili kuhakikisha wakulima na Wadau wengine kuwa Mbegu wanazouziwa zenye Lebo ya TOSCI  ni sahihi kwa matumizi.                                    

Pia amesema kuwa matumizi ya Lebo za ubora za TOSCI kumesababisha kupungua kwa tatizo la uwepo wa Mbegu feki na zilizo na ubora hafifu hapa nchini.

DAWASA KUBORESHA HUDUMA KUPITIA MIRADI SABA

Mamlaka ya  Majisafi na Usafi wa Mazingira Dar es Salaam (DAWASA) imejipanga kuendelea kuboresha upatikanaji wa huduma ya majisafi kupitia utekelezaji wa miradi  Saba ya kimkakati  ikiwemo mradi wa ujenzi wa bwawa la Kidunda, mradi wa ujenzi wa mtambo wa kuzalisha maji wa Rufiji na mradi wa maji Kwala. 

Hayo yameelezwa na Kaimu Afisa Mkuu was DAWASA Kiula Kingu  Leo Agosti 11,2023 wakati akizungumza na waandishi wa habari Jijini Dodoma kuhusu utekelezaji wa majukumu ya mamlaka hiyo.

 Kingu amesema Miradi  iliyotekelezwa imegharimu shilingi bilioni 425.9 inalenga  kuongeza wingi wa maji yanayozalishwa na DAWASA, kuongeza uwezo wa kuhifadhi maji, kuimarisha mfumo wa usambazaji maji na kuimarisha huduma katika maeneo ambayo hayana mtandao hasa  ya pembezoni.

Aidha Kingu ameeleza pamoja na kuwekeza nguvu katika utoaji wa huduma za majisafi, DAWASA imejipanga kikamilifu na kuchukua hatua za makusudi za kuboresha usafi wa mazingira kupitia miradi mikubwa na midogo. Hii ni kwa sababu upatikanaji wa maji unapoongezeka unapaswa uambatane na usimamizi madhubuti wa usafi wa mazingira.

Hata hivyo Mradi mwingine ni wa kujenga mfumo wa kukusanya majitaka na maeneo nufaika ambapo katika awamu hii ni Mbezi beach, Kilongamwima, baadhi ya maeneo ya Kawe na Salasala. Utekelezaji wa mradi umeanza na Wakandarasi wanaendelea na shughuli za maandalizi ya ujenzi.

DAWASA pia imekuja na ubunifu wa kujenga mifumo na mitambo midogo midogo ya kuchakata majitaka inayojengwa maeneo ya pembezoni ambapo zaidi ya lita 780,000 za majitaka zitakuwa zikichakatwa kwa siku. Miradi hii itajumuisha ujenzi wa vyoo vya umma 30 ambavyo vitasaidia kuboresha usafi wa mazingira. 

Ameeleza kwamba miradi hii itasaidia wananchi kupata huduma za usafi wa mazingira kwa gharama nafuu karibu pia Wakandarasi  wanaendelea na ujenzi na gharama za miradi  ni jumla ya shilingi bilioni 25.7 na wanufaika wanakadiriwa kufikia milioni 1.8.

Alimalizia kwa kusema Miradi hii ni ya kisasa na  mfumo wake wa uchakataji majitaka itatoa gesi asilia kwa ajili ya kupikia, itatoa mbolea itakayoweza kutumika katika kustawisha bustani za miti na majani pia maji yatakayochakatwa yataweza kutumika kwa ajili ya shughuli za umwagiliaji, usafishaji wa barabara na mitaro ama kupoozea mitambo.

TUME YA MAENDELEO USHIRIKA TANZANIA YAONDOA BODI 55

Tume ya maendeleo ya Ushirika Tanzania imeondoa bodi za vyama  vya Ushirika 55  ambazo hazikufuata kanuni na taratibu za Ushirika,na kupeleke masuala 30 polisi na masuala 47 Takukuru kwaajili ya kuyafanyia Kazi.

Hayo yameelezwa na Mrajisi wa vyama vya Ushirika na Mtendaji Mkuu wa Tume ya maendeleo ya Ushirika Tanzania Dkt Benson Ndiege katika mkutano wake Jijini Dodoma akieleza utekelezaji wa majukumu ya tume hiyo na mwelekeo wa utekelezaji kwa mwaka wa fedha 2023/24.

Aidha Dkt Ndiege amesema katika kuhakikisha Maafisa Ushirika wanaweza kubaini na kutatua changamoto mbalimbali zinazokabili vyama wameamua kutoa mafunzo kwa Maafisa hawa.

Hata hivyo tume hiyo ufanya ukaguzi wa Mara kwa Mara katika vyama vya Ushirika ikiwa lengo ni kubaini uzingatiwaji wa matakwa ya Sheria kanuni na miongozo mbalimbali inayohusiana na utendaji wa vyama vya Ushirika.

TAASISI YA MWALIMU NYERERE YATOA MISAADA KWA JAMII.

TAASISI ya Kumbukumbu ya Mwalimu Julius Kambarage Nyerere Mkoa wa Pwani kwa kushirikiana na Chuo cha Afya cha St David cha Jijini Dar es Salaam wametoa misaada ya kadi za bima ya afya ya jamii (CHF) vifaa vya shule na vyakula kwa wanafunzi wanaoishi kwenye mazingira magumu.

Akizungumza mara baada ya kukabidhi fedha kwa ajili ya bima za afya kwa baadhi ya wagonjwa waliolazwa Hospitali ya Rufaa ya Mkoa wa Pwani Tumbi, vifaa kwa wanafunzi wa shule ya msingi Muungano Wilayani Kibaha na vyakula kwa wanafunzi wa shule ya Msingi Mkokozi Wilaya ya Mkuranga, katibu wa taasisi hiyo Omary Punzi alisema kuwa moja ya jukumu lao ni kuisaidia jamii.

Naye Josephine Kiondo muuguzi wa wodi ya watoto ya Hospitali ya Rufaa ya Mkoa Tumbi alisema kuwa wanaishukuru taasisi hiyo kwa kuwasaidia familia hizo kupata kadi za bima zitawasaidia kukabiliana na gharama za matibabu na kuomba kuendelea kuwasaidia wanajamii.

Kwa upande wake Mwalimu mkuu wa shule ya msingi Muungano Faith Tawe alisema kuwa wanashukuru kuwasaidia wanafunzi hao kwani itawapa ari ya kusoma ambapo baadhi ya wazazi wanalea watoto kwenye hali ngumu na kusababisha wanafunzi hao kukosa baadhi ya mahitaji ya shule hivyo kutofanya vizuri kwenye masomo yao.

Mwalimu mkuu wa shule ya Msingi Mkokozi Richard Tiyara alisema kuwa wanashukuru kwa misaada ya vyakula kwani wana changamoto kubwa ya chakula na shule hiyo ina wanafunzi wenye ulemavu 79 ambapo wanaoishi bweni ni 23 ambapo bweni hilo ni kwa wasichana tu limejengwa kwa thamani ya shilingi milioni 140

HOSPITALI YA MUHIMBILI KUPANDIKIZA MIMBA

Katika kutoa huduma za kibingwa na ubingwa bobezi hospital ya Taifa Muhimbili inampango wa kuanzisha huduma za kupandikiza mimba na upandikizaji Figo, uloto na vifaa vya usikivu ambapo  wakati wowote  kwa Wanawake ambao wana matatizo ya kutopata ujauzito watapata huduma hiyo.

Hayo amesemwa Agosti 10, 2023 Mkurugezi Mtendaji wa hospitali ya Taifa Muhimbili Prof. Mohamed Janabi wakati akizungumza na waandishi wa habari jijini Dodoma kuhusu utekelezaji wa  shughuli mbalimbali na mwelekeo wa mwaka wa fedha 2023/2024.

Amesema kuwa hospital ihiyo imeona iazishe huduma hizo ili kupunguza wingi wa watu wanaokwenda nje ya inchi kwa ajili ya kupata huduma hiyo.

Pia amesema kuwa hospitali hiyo imeanzisha utaratibu wa kulipia huduma ya maegesho ilii isaidie kupunguza msongamano wa magari ndani ya hospitali kutokana na watu kuegesha magari katika maeneo hayo 

Katika hatua nyingine amesema kuwa wanatarajia kubomoa Hospitali hiyo na kujenga kubwa zaidi kwaajili ya kuboresha utoaji wa huduma bora za Afya na kuendana na wakati.

Mbali na hayo Hospitali hiyo,katika Mwaka wa Fedha 2023/2024 imeidhinishiwa na Serikali jumla ya Shilingi Bilioni170.6 ili kutekeleza vipaumbele vyake.