TAASISI WEZESHI ZITOE ELIMU YA WANAYOYAFANYA

MKUU wa Mkoa wa Pwani Stanslaus Nyongo amezitaka taasisi wezeshi zisiwe adui badala yake zitoe elimu kwa wadau wake ili kuondoa hali yakuonekana kama ni maadui kwa wawekezaji.

Nyongo aliyasema hayo kwenye semina ya Viwanda kupitia Chemba ya Taifa ya Biashara (TNCC) Mkoa wa Pwani.

Alisema kuwa taasisi hizo zinapaswa kuweka mazingira wezeshi kwa wafanyabiashara na wawekezaji badala ya kuonekana wao kama ni maadui wa biashara.

"Taasisi wezeshi zinapaswa kuwa daraja kati yao na serikali hivyo zinapaswa kutoa elimu juu ya utendaji kazi wao ili kuwa na ushirikiano kwani lengo ni kuboresha mazingira ya utendaji kazi,"alisema Nyongo.

Alisema kuwa kazi yao kubwa ni kujenga uelewa juu ya kazi zao na kutatua changamoto za wawekezaji na wafanyabiashara ili mazingira yawe bora.

"Sekta wezeshi pia zisikilize hoja zisionekane kama kazi yao ni kukusanya tu mapato bali wajue changamoto zao na kuzitatua na serikali inasikiliza maoni na kuyafanyia kazi,"alisema Nyongo.

Aidha alisema kuwa changamoto ya miundombinu mibovu ya barabara ya kwenda viwandani inafanyiwa kazi kwani kuna mkakati maalum kutenga fedha kiasi cha shilingi bilioni 28.

"Kwa sasa mkoa una viwanda 1,768 vikubwa vikiwa ni 503 vya kati 248 vidogo 1,017 na vimetoa ajira rasmi kwa watu zaidi ya 23,000 na zisizo rasmi zaidi ya 62,000,"alisema Nyongo.

Kwa upanda wake Rais wa TNCC Vicent Minja alisema kuwa serikali imeipa sekta binafsi kutekeleza kwa zaidi ya asilimia 70 ya kufikia dira ya maendeleo wamejipanga kufikia lengo hilo.

Minja alisema kuwa kwakuwa serikali imewaamini wasilalamike bali watoe mapendekezo kwani wameona mabadiliko kwa baadhi ya sheria ambazo zimebadilishwa na bunge.

Naye Mwenyekiti wa TNCC Mkoa wa Pwani Said Mfinanga alisema kuwa sekta wezeshi zinapaswa kuwa wawezeshaji na siyo wakwamishaji wa uwekezaji.

Mfinanga alisema kuwa majukwaa kama hayo yamekuwa yakiwaweka kwa pamoja na sekta wezeshi ili kujadili kwa pamoja na kukabili changamoto.

WANANCHI WAHIMIZWA KUJITOKEZA KUPATA MSAADA WA KISHERIA

 
WAZIRI wa Katiba na Sheria Abdala Ulega amewataka wananchi kujitokeza kupata huduma za Msaada wa Kisheria kutoka kwa wataalam wa sheria.

Ameyasema hayo stendi ya zamani ya Maili Moja Kibaha wakati wa uzinduzi wa Kampeni ya Msaada wa Kisheria ya Mama Samia awamu ya pili kwa Mkoa wa Pwani.

Ulega amesema Msaada wa kisheria ni kwa watu wote bila ya kujali uwezo wa mtu na unatolewa bure hasa kwa makundi yakiwemo ya wanawake watoto watu wenye ulemavu na wale wasio na uwezo.

RC NYONGO AWAHAMASISHA WANANCHI PWANI KUJIUNGA NA MPANGO WA AFYA KWA WOTE

Mkuu wa Mkoa wa Pwani, Mhe. Stanslaus Haroon Nyongo, amewahimiza wananchi kujiunga na Mpango wa Afya kwa Wote ili kulinda familia zao dhidi ya gharama kubwa za matibabu. Wito huo ameutoa Oktoba 22, 2026, wakati wa uzinduzi wa Awamu ya Pili ya Utekelezaji wa mpango huo mkoani Pwani.

Amesema awamu hiyo inahusisha usajili wa kaya za wananchi wasio na uwezo wa kifedha pamoja na zile zenye uwezo, kwa mchango wa Shilingi 150,000 kwa kaya yenye watu wasiozidi sita. Mpango huo utamwezesha mwananchi kupata matibabu katika vituo vya afya ndani na nje ya Mkoa wa Pwani.

Mhe. Nyongo amemshukuru Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwa kusimamia utekelezaji wa mpango huo unaolenga kuhakikisha kila mwananchi anapata matibabu bila vikwazo vya kifedha. Ameeleza kuwa tangu Februari 2026, Serikali imeanza kugharamia mpango huo kwa makundi maalumu yenye uhitaji, yakiwemo wazee, watoto, wajawazito na watu wenye ulemavu.

Aidha, amewaagiza watendaji wa Serikali kuhakikisha wananchi wanapata elimu na fursa za usajili katika vijiji, mitaa na kata zote, huku NHIF ikitakiwa kuweka mawakala wa kutosha. Pia, amesisitiza tathmini ya usajili baada ya siku 10, upatikanaji wa dawa na vifaa tiba, na kuhakikisha kila mwananchi aliyejiunga anapata matibabu bila vikwazo visivyo halali.

              

RC NYONGO AITAKA TARURA KUBORESHA BARABARA MAENEO YA VIWANDANI

Mkuu wa Mkoa wa Pwani, Mhe. Stanslaus Haroon Nyongo, ameitaka TARURA kuongeza juhudi za kuboresha barabara katika maeneo ya viwanda, hususan Zegereni, Kibaha, ili kurahisisha shughuli za uzalishaji na usafirishaji wa bidhaa.

Ametoa agizo hilo Oktoba 22, 2026, alipotembelea Kongani ya Viwanda ya King Lion, Kibaha, katika ziara ya kufuatilia maendeleo ya uwekezaji na kusikiliza changamoto zinazowakabili wawekezaji.

Mhe. Nyongo amesema maeneo ya viwanda yana mchango mkubwa katika kukuza uchumi, kuongeza ajira na mapato ya Serikali, hivyo yanapaswa kupewa kipaumbele katika uboreshaji wa miundombinu. Aidha, amesema kukamilika kwa Kituo cha Kupoza Umeme cha Mlandizi kunatarajiwa kuimarisha upatikanaji wa umeme kwa shughuli za uzalishaji.

Kwa upande wake, Meneja Mkuu wa Uendeshaji wa Kongani ya Viwanda ya King Lion, Jerry Chow, amesema barabara na upatikanaji wa umeme wa uhakika ni miongoni mwa changamoto zinazoathiri uzalishaji. Ziara hiyo inalenga kuhakikisha changamoto za wawekezaji zinapatiwa ufumbuzi ili kuimarisha uwekezaji na ukuaji wa uchumi wa Mkoa wa Pwani.

               

RC NYONGO AMPA MKANDARASI MWEZI MMOJA KUKAMILISHA MRADI WA TACTIC KIBAHA

Mkuu wa Mkoa wa Pwani, Mhe. Stanslaus Haroon Nyongo, amempa mkandarasi anayetekeleza miradi ya TACTIC katika Manispaa ya Kibaha muda wa mwezi mmoja kukamilisha na kukabidhi angalau mradi mmoja, akieleza kutoridhishwa na kasi ya utekelezaji licha ya Serikali kutoa fedha za miradi hiyo.

Ametoa maagizo hayo Oktoba 22, 2026, wakati wa ziara ya kikazi ya kukagua maendeleo ya miradi hiyo, huku akimtaka mkandarasi kuongeza kasi ya ujenzi kwa kufanya kazi usiku na mchana na kuzingatia masharti ya mkataba yanayotaka miradi ikamilike ifikapo Februari 2027.

Mhe. Nyongo amesisitiza kuwa Serikali imetimiza wajibu wake wa kutoa fedha na vifaa vya ujenzi vinapatikana, hivyo hakuna sababu ya kuchelewesha kazi. Aidha, ametangaza kurejea kukagua utekelezaji wa agizo hilo Novemba 22, 2026.

Kwa upande wake, Mratibu wa Mradi, Mhandisi Shaban Kaswaka, ameahidi kuhakikisha angalau mradi mmoja unakamilika ndani ya muda uliotolewa. Hatua hiyo inalenga kuharakisha utekelezaji wa miradi na kuhakikisha wananchi wananufaika na uwekezaji wa Serikali kwa wakati.

              

WANAOMILIKI SILAHA ZISIZO NA VIBALI WASALIMISHE KWA HIYARI

Jeshi la Polisi Mkoa wa Pwani linatoa wito kwa wananchi wote wanaomiliki silaha kinyume cha sheria au silaha ambazo hazina vibali kuzisalimisha kwa hiari ikiwa zimesalia siku 10 kabla ya kukamilika kwa zoezi la usalimishaji wa silaha linaloendelea nchini kote.

Ikumbukwe, Agosti 30, 2026 Waziri wa Mambo ya Ndani ya Nchi Mhe. Patrobas Katambi alizindua Kampeni ya usalimishaji wa silaha kwa hiyari katika uwanja wa Nyerere Square Jijini Dodoma, ambapo alitangaza kuanza kwa kipindi cha msamaha kuanzia tarehe 1 Septemba hadi tarehe 31 Oktoba, 2026.

Lengo la kampeni hiyo ni kuwapa fursa wananchi wanaomiliki silaha kinyume cha sheria kusalimisha kwa hiyari bila ya kuchukuliwa hatua za kisheria ndani ya kipindi cha msamaha uliotangazwa.

Kampeni ya usalimishaji silaha kwa mwaka 2026 inabebwa na kauli mbiu isemayo "Salimisha Silaha haramu Jenga Jamii Salama". 

Zikiwa zimesalia siku 10 zilizotolewa na Serikali kumalizika, tayari silaha haramu na zinazomilikiwa kinyume cha sheria zipatazo 42 zishasalimishwa mkoani Pwani ambazo ni Pisto 9, Magobore 12 na Short gun/Rifle 21.

Jeshi la Polisi Mkoa wa Pwani linawataka wananchi wanaomiliki silaha kinyume cha sheria kutumia siku zilizosalia kusalimisha silaha hizo katika maeneo yaliyotangazwa ambayo ni katika vituo vya Polisi na ofisi za watendaji/serikali za mitaa.

Aidha, Jeshi la Polisi Mkoa wa Pwani linaendelea kusisitiza na kuwakumbusha wamiliki wa silaha haramu kutambua kuwa, kushindwa kusalimisha silaha hizo kutawapelekea kukutana na mkono wa sheria na hakutakuwa na msahama baada ya

kumalizka kwa siku zilizotangazwa na serikali.

Jeshi la Polisi Mkoa wa Pwani litaanza msako wa nyumba kwa nyumba kupitia taarifa za wasiri wetu kuwakamata wale wote ambao wamekaidi agizo la

serikali la kusalimisha silaha kwa hiyari yao.

Ni vyema ikafamika kuwa watakaokamatwa wanapaswa kutambua adhabu ya kosa hilo ni kifungo cha miaka 10 Jela, ama faini milioni 15 au vyote kwa pamoja.

RC NYONGO KUFUNGUA RASMI AWAMU YA PILI YA BIMA YA AFYA KWA WOTE PWANI

Mkuu wa Mkoa wa Pwani, Mhe. Stanslaus Nyongo, amesema Mkoa wa Pwani unatarajia kufungua rasmi Awamu ya Pili ya Utekelezaji wa Mpango wa Bima ya Afya kwa Wote tarehe 22 Oktoba 2026, ikiwa ni sehemu ya jitihada za kuhakikisha wananchi wanapata huduma za afya bila kukabiliwa na mzigo mkubwa wa gharama za matibabu.

Mhe. Nyongo ameyasema hayo leo, Oktoba 20, 2026, na kubainisha kuwa ufunguzi huo utafanyika katika viwanja vya standi ya zamani Maili Moja alipokuwa akizungumza na waandishi wa habari ofisini kwake mjini Kibaha, ambapo amewahimiza wananchi wa Mkoa wa Pwani kujitokeza kujiunga na mpango huo unaotekelezwa kwa mujibu wa Sheria ya Bima ya Afya kwa Wote ya mwaka 2023.

Amesema mpango huo unalenga kulinda afya na uchumi wa wananchi kwa kuhakikisha kuwa wanapokabiliwa na changamoto za kiafya, wao na familia zao hawalazimiki kuuza mali au kukopa fedha ili kugharamia matibabu.

“Afya ndiyo msingi wa maendeleo ya jamii. Mwananchi anapokuwa na afya njema anaweza kushiriki kikamilifu katika shughuli za uzalishaji, ikiwemo kilimo, biashara, uvuvi na shughuli nyingine za kiuchumi. Bima ya afya ni kinga inayosaidia kulinda afya na ustawi wa familia,” amesema Mhe. Nyongo.

Aidha, Mkuu huyo wa Mkoa amemshukuru Rais wa Jamhuri ya Muungano wa Tanzania, Dkt. Samia Suluhu Hassan, kwa kuendeleza jitihada za kuhakikisha wananchi wanapata huduma bora za afya bila kujali kipato chao au eneo wanaloishi.

Akizungumzia kaulimbiu ya uzinduzi huo,ambayo ni  “Bimika na Fahari ya Bima,” Mhe. Nyongo amesema inalenga kuhamasisha wananchi kutambua umuhimu wa kujiunga na bima ya afya kama hatua ya kujilinda dhidi ya gharama za matibabu na kupanga maisha ya familia zao.

Akitoa takwimu za utekelezaji wa awamu ya kwanza Mhe. Nyongo amesema hadi Oktoba 20, 2026, jumla ya kaya 4,463, sawa na asilimia 72 ya kaya lengwa 6,212, zilikuwa zimesajiliwa katika mpango huo.

Katika Awamu ya Pili, Mkoa wa Pwani umelenga kusajili kaya 12,872 zenye jumla ya wanufaika 23,304. Katika maandalizi ya awali, kaya 1,640 zenye wanufaika 2,296 zimefanyiwa uhakiki na kusajiliwa.

Mhe. Nyongo amewahimiza wananchi kutumia fursa hiyo kujiunga na mpango huo kwa kuchangia shilingi 150,000 kwa kila kaya yenye watu sita, akisisitiza umuhimu wa kujiandaa mapema kwa kuwa ugonjwa unaweza kumpata mtu wakati wowote.

Vilevile, amevitaka vyombo vya habari kuwa mabalozi wa kuelimisha umma kuhusu umuhimu wa Bima ya Afya kwa Wote kwa kutumia redio, magazeti, televisheni na majukwaa ya kidijitali ili kuhakikisha taarifa sahihi zinawafikia wananchi wengi zaidi.

Uzinduzi rasmi wa Awamu ya Pili ya Mpango wa Bima ya Afya kwa Wote Mkoa wa Pwani unatarajiwa kufanyika Oktoba 22, 2026, katika Viwanja vya Stendi ya Zamani, Maili Moja, Kibaha, ambapo wananchi pia watapata huduma mbalimbali za upimaji wa afya bila malipo.