BONDIA KIBAHA ATAKA KUZICHAPA NA MACHALI NA NYILAWILA

Na John Gagarini, Kibaha

BONDIA Zumba Kukwe wa Maili Moja wilayani Kibaha Mkoani Pwani ambaye leo anapambana na bondia Sweet Kalulu amesema kuwa lengo lake kubwa ni kupambana na Thomas Mashali au Kalama Nyilawila.

Akizungumza na waandishi wa habari jana mjini Kibaha wakati wakipima uzito na kupima afya kwenye ukumbi wa Container Bar alisema kuwa leo atamshinda mpinzani wake raundi ya tatu.

Kukwe alisema kuwa kwenye pambano lake la leo anatarajia kufanya vizuri kwa kumpiga mpinzani wake na kuwapa raha wapenzi wa ngumi wa mkoa wa Pwani.

“Nimejipanga vizuri kwenye pambano langu na sitawaangusha wapenzi wangu kwani niko kwenye uwanja wa nyumbani, naangalia mbele zaidi ninaowataka ni Mashali au Nyilawila,” alisema Kukwe.

Aidha alisema kuwa anatarajia kuiweka Pwani kwenye ramani ya mchezo huo wa ngumi hivyo malengo yake ni kupambana na mabingwa wa Tanzania.

“Najiamini kuwa nina uwezo na baada ya pambano la leo safari yangu ya kuanza kutamba kwenye ulimwengu wa ngumi itaanza na nitahakikisha ngumi inakuwa juu mkoani Pwani,” alisema Kukwe.

Kwa upande wake Kalulu alisema kuwa yeye hana maneno mengi anachosubiri ni muda tu ufike na kila mtu atajua  nini kilichomleta Kibaha kwnai anauwezo.

Naye muandaaji wa pambano hilo George Nyasulu alisema kuwa lengo la kuandaa pambano hilo ni kuwahamasisha vijana wanaopenda mchezo huo kujitokeza ili kucheza mchezo huo.

Nyasulu alisema kuwa huo ni mwanzo kwani baadaye ataandaa mapambano mengi zaidi na nia ni kutoa bingwa wa ngumi Taifa kwani vijana wana uwezo.Jumla ya mapambano saba ya utangulizi yatachezwa.

Mwisho.

Mabondia Sweet Kalulu kushoto na Zumba Kukwe kulia katikati mwandaaji wa pambano hilo George Nyasalu akishuhudia mara baada ya kupima uzito na afya kabla ya pambano lao 

 

WAFANYABIASHARA WATAKIWA KUKATIA BIMA BIASHARA ZAO KUKABILIANA NA MAJANGA

Na John Gagarini, Kibaha

KUFUATIA maduka kadhaa kungua moto eneo la Maili Moja wilayani Kibaha  wafanyabiashara mkoani Pwani wameshauriwa kukatia bima biashara zao ili kukabiliana na hasara zinazoweza kujitokeza kutokana na majanga kama hayo.

Akizungumza na mwandishi wa habari hizi mjini Kibaha mara baada ya kuwakabidhi msaada wa fedha kiasi cha shilingi 810,000 wahanga wa moto huo mwenyekiti wa Jumuiya ya Wafanyabiashara Tanzania (JWT) mkoa wa Pwani, Abdala Ndauka alisema kuwa moto huo umewapa hasara kubwa wafanyabiashara hao.

Ndauka alisema kuwa imefika wakati sasa kwa wafanyabiashara kukata bima za biashara zao ili mara wapatapo majanga kama ya moto au wizi bima itawafidia na wataweza kuendelea vizuri na biashara bila ya kuyumba.

“Ule moto umesababisha hasara kubwa kwa wafanyabiashara wenzetu kwani hawakuweza kuokoa bidhaa zote ziliteketea kwa moto hivyo umuhimu wa bima umeonekana kwani wangekuwa nayo wangelipwa,” alisema Ndauka.

Akizungumzia juu ya msaada huo alisema kuwa baada ya wenzao kupata tatizo hilo walichanga fedha hizo kama pole kwa wenzao watatu ambao walipata tatizo hilo la kuunguliwa maduka yao ya biashara mbalimbali.

Aidha alisema fedha hizo zimechangwa na sehemu ya wafanyabiashara wanachama wa JWT ambao ni zaidi ya 300 kati ya 800 wanaounda umoja huo.

“Kutokana na tukio  hili tumeazimia kuanzisha mfuko wa maafa ili tuweze kusaidiana mara yanapotokea matatizo kama haya na fedha zitakazopatikana ziweze kuwasaidia waathirika,” alisema Ndauka.

Naye Ally Gonzi moja ya waathirika wa moto huo aliwashukuru wanajumuiya hiyo kwa msaada walioutoa na kusema kuwa serikali inapaswa kuhakikisha mkoa huo unakuwa na huduma ya zimamoto kwani moto ulipotokea hawakuweza kupata huduma hiyo licha ya kuwa wanalipia huduma hiyo.

Gonzi alisema kuwa endapo mkoa huo ungekuwa na gari la zimamoto basi mali zilizoteketea zingeweza kuokolewa hasa ikizingatiwa  ofisi za kikosi hicho ziko jirani kabisa na tukio lilipotokea ambapo waathirika wengine ni Urisha Mwembamba na Adam Mwasha.

Mwisho.

DC KUDHIBITI MADK WEZI WA DAWA

Na John Gagarini, Rufiji

MKUU wa Wilaya ya Rufiji mkoani Pwani Nurdin Babu amesema atawachukulia hatua kali baadhi ya madaktari watakaobainika kuiba dawa na kuziuza kwenye maduka ya dawa.

Aliyasema hayo kwenye Kijiji cha Nyambili-Bungu wilayani humo wakati akielezea umuhimu wa wananchi kujiunga na mfuko wa Afya ya Jamii (CHF).

Babu alisema kuwa baadhi ya madaktari kwenye zahanati vijijini wamekuwa wakiiba dawa muhimu kisha kuziuza kwenye maduka hayo na kuacha maboksi matupu wakidai kuwa zimetumiwa na kuisha.

“Dawa hizi si sukari kusema watu wanalamba kila wakati lakini ni baadhi ya madaktari wasiokuwa waaminifu wamekuwa wakiziuza dawa hizo na kila wananchi wanapoandikiwa dawa wanaambiwa zimekwisha je zinakwishaje wakati wagonjwa hawajapewa tutawashughulikia nyie tupeni taarifa,” alisema Babu.

Alisema kutokana na hali hiyo anaacha namba yake ya simu ili apewe taarifa za madaktari wanaofanya mchezo huo ili akabiliane nao na kuwataka wananchi kutoa taarifa.

Kwa upande wake mganga mkuu wa wilaya ya Rufiji Dk Michael Michael alisema njia rahisi ya kupata matibabu ni kujiunga na mfuko huo ambapo familia ya watu sita inalipa 10,000 kwa mwaka lakini kwa wasiojiunga wanalipa 3,000 kila wanapomwona daktari.

“Uzuri wa sasa ni kwamba kutakuwa na kamati ya Kijiji ya afya ambayo itakuwa na uwezo wa kununua dawa wanazoona zimekwisha au zinazohitaji kutokana na tatizo la eneo husika,” alisema Dk Molel.

Aidha alisema kuwa wataingia mikataba na wamiliki wa maduka ili dawa zinapokwisha wawe wanawapa wagonjwa ili kuondoa kero na kusema kuwa mfumo huu utaondoa changamoto ya dawa.

Naye mratibu wa CHF wilaya hiyo Rashid Mihuka alisema kuwa kutaanzishwa madirisha ya dawa kwa ajili ya wanachama wa mfuko huo ili kuboresha huduma kwa wateja wa mfuko huo.

Mwisho.

KLABU YA JOGGING YAZINDULIWA MKE WA MBUNGE ASAIDIA FEDHA

Na John Gagarini, Kibaha

WANANCHI wa Maili Moja wilayani Kibaha mkoani Pwani wametakiwa kujiunga na klabu za mazoezi kwa ajili ya kuboresha afya zao pamoja na kuinua vipaji vya michezo.

Hayo yalisemwa mjini Kibaha na mke wa Mbunge wa Jimbo la Kibaha Mjini Selina Koka alipokuwa akizindua klabu ya mazoezi ya Makapalo Jogging Club ya Maili Moja Shuleni chini ya chama cha msalaba Mwekundu.

Koka alisema kuwa mazoezi ni sehemu ya kujenga afya bora kukabiliana na maradhi yanayotokana na kutofanya mazoezi.

“Ufanayaji wa mazoezi unasaidia kukabiliana na magonjwa ambayo endapo mtu akifanya mzaoezi anaweza kuyaepuka kama vile kisukari, uzito na homa,” alisema Koka.

Alisema kuwa baadhi ya watu wamekuwa hawana utamaduni wa kufanya mazoezi lakini mazoezi ni dawa ya kukabiliana na magonjwa ambayo wanaweza kuyamudu kama watafanya mazoezi.

“Mazoezi kwa sasa ni kila kitu hivyo watu wakijiunga na vilabu hivi vya mazoezi itasaidia kukabiliana na maradhi pia tutawajengea vijana kupenda michezo na kuinua vipaji,” alisema Koka.

Aidha aliwataka wananchi kujijengea utamaduni wa kufanya mazoezi kila wakati hasa nyakati za asubuhi na jioni.

Awali akimkaribisha Koka mwenyekiti wa klabu hiyo Tekla Clemence alisema kuwa changamoto kubwa inayowakabili ni vifaa vya mazoezi ambapo walipatiwa kiasi cha shilingi 150,000 kwa ajili ya ununuzi wa vifaa.

Mwisho. 

WALIOUNGULIWA MOTO WASAIDIWA NA MKE WA MBUNGE ASAIDIA MSALABA MWEKUNDU

Na John Gagarini, Kibaha

WAFANYABIASHARA wa maduka ambayo yaliungua moto eneo la Maili Moja wilayani Kibaha mkoani Pwani wamepewa msaada wa mifuko 30 ya saruji yenye thamani ya shilingi 480,000 kwa ajili ya kujenga maduka yao.

Msaada huo ulitolewa na mdau huyo ambaye pia ni kada wa Chama Cha Mapinduzi (CCM) Dk David Nicas na kusema kuwa ameamua kujitolea ili kuwafariji wahanga hao ambao wamepata hasara kubwa.

Dk Nicas alisema kuwa wafanyabiashara hao walikuwa na mataratijio makubwa ya kuboresha biashara na maisha yao lakini ndoto zao zimekwenda kinyume.

“Janga la moto au lolote halina hodi wa taarifa linatokea wakati wowote bila ya kutegemea na linaleta umaskini kwani hawa waliamka na fedha lakini sasa hawana fedha tena na sisi ndiyo wa kuwasaidia ili kuwapa moyo, alisema Dk Nicas.

Aidha alisema kuwa moto huo umesababisha hasara ambayo haiwezi kulipika zaidi ya kuwasaidia na kuwafariji wafanyabiashara hao ambao bidhaa zao pamoja na fedha viliteketea kwa moto.

“Tunaimba serikali ya mkoa kuhakikisha inakuwa na gari lake la zimamoto badala ya kutegemea kutoka Jijini Dar es Salaam, licha ya kuwa wanalipa fedha kwa ajili ya huduma za zimamoto,” alisema Dk Nicas

Kwa upande wake mwakilishi wa wafanyabiashara hao Ally Gonzi alishukuru msaada huo na kusema kuwa umekuja wakati mwafaka na utawasaidia kukabiliana na gharama za ujenzi mpya wa maduka yao.

“Tunashukuru kwa msaada huu na tunawaomba wadau wengine nao wajitokeze kutusaidia ili angalau tuweze kurejesha biashara zetu kama ilivyokawaida,” alisema Gonzi.

Alisema kuwa gharama za hasara waliyoipata inakadiriwa kufikia zaidi ya shilingi milioni 700 ambapo katika tukio hilo mfanyabiashara mmoja alijeruhiwa na moto.

Mwisho.   

Na John Gagarini, Kibaha

MKE wa Mbunge wa Jimbo la Kibaha Mjini mkoani Pwani Selina Koka ametoa hundi ya shilingi milioni moja kwa Chama Cha Msalaba Mwekundu tawi la Maili Moja ili wanunulie vifaa vya kutolea msaada wakati wa majanga.

Akizungumza mjini Kibaha wakati wa mkutano wa Chama na kusema kuwa amejitolea fedha hizo kwa ajili ya kuboresha utoaji huduma kwa chama hicho kwenye jamii.

Koka alisema kuwa chama hicho ni muhimu ndani ya jamii kwani kimekuwa kikisaidia mara yanapotokea maafa mbalimbali katika jamii kama vile moto, ajali, mafuriko, kimbunga na majanga mengine.

“Nimesikia kwenye risala yenu kuwa mnaazima vifaa kwa ajili ya kutolea huduma naomba niwapatie fedha ili mnunue vifaa vyenu ili mfanye kazi zenu kwa uhakika bila ya kubahatisha,” alisema Koka.  

Aidha alisema kuwa chama hicho ni muhimu sana kwa jamii kwani kinajitolea kusaidia watu wenye matatizo mbalimbali na dhana kuu ya chama ni kujitolea.

“Hawa wanajitolea kwenye shughuli mbalimbali hivyo tunaomba wadau wajitokeze kuwasaidia hawa ili waisaidie jamii yenye matatizo,” alisema Koka.

Naye mwenyekiti wa chama hicho tawi la Maili Moja Lazaro Kwiligwa alisema kuwa wanamshukuru mke wa Mbunge kwani vifaa ilikuwa ni changamoto kubwa kwao.

“Tulikuwa tunaazima vifaa jambo ambalo linatusababisha tushindwe kutoa huduma ipasavyo  lakini sasa tutafanya kazi zetu kwa uhuru,” alisema Kwiligwa.

Lazaro alisema kuwa tawi hilo lilianza mwaka 2013 na lina wanachama 280 huku hai wakiwa 168 ambapo aliwataka wanachama wote walipe ada zao ili wawe hai.

Mwisho.

Picha 3831 Mke wa Mbunge wa Jimbo la Kibaha Mjini Selina Koka kushoto akimkabidhi jora la kushonea sare, mwenyekiti wa tawi la Maili Moja la chama cha msalaba mwekundu Lazaro Kwiligwa.

Picha 3830 Mke wa Mbunge wa Jimbo la Kibaha Mjini Selina Koka kushoto akimkabidhi kizibao mwenyekiti wa chama cha msalaba mwekundu tawi la Maili Moja Lazaro Kwiligwa.

Picha 3829 Mke wa Mbunge wa Jimbo la Kibaha Mjini Selina Koka akionyesha moja ya vizibao ambavyo alivitoa kwa chama cha msalaba mwekundu tawi la maili Moja, kulia mwenyekiti wa tawi hilo Lazaro Kwiligwa na katikati ni msaidizi wa Mbunge Method Mselewa.

Picha 3784 Mdau wa Maendeleo wa maili Moja wilayani Kibaha Dk David Nicas kushoto akimkabidhi mfuko wa sementi moja ya wafanyabiashara ambao maduka yao yaliteketea kwa moto Ally Gonzi kulia

Picha Na John Gagarini

TALGWU KUTOT

Na John Gagarini, Kibaha

CHAMA Cha Wafanyakazi wa Serikali za Mitaa (TALGWU) kwenye Halmashauri ya Mji wa Kibaha mkoani Pwani kimesema kuwa kitadai haki za wanachama wake kwa kukaa mezani na si kwa kufanya migomo au maandamano.

Hayo yalisemwa mjini Kibaha na mwenyekiti wa chama hicho Tawi la Kibaha Mji, Adolf Masawa wakati wa kufunga mafunzo ya viongozi wapya wa matawi kwenye halmashauri hiyo

Masawa alisema kuwa baadhi ya vyama vya wafanyakazi vimekuwa vikidai haki zao kwa kufanya migomo na maandamano jambo ambalo linasababisha utoaji huduma kuwa mbaya.

“Sisi tutafuata taratibu na sheria katika kudai haki na hatutakuwa tayari kuwatetea wanachama ambao hawawajibiki kwani haki inakwenda sambamba na uwajibikaji,” alisema Masawa.

Aidha alisema kuwa wao hawana ushabiki na ndiyo sababu chama chao huwa hakifuati mkumbo katika kudai haki zao kama ilivyo kwa baadhi ya vyama hali ambayo inasababisha usumbufu kwa wateja wanaowahudumia.

Kwa upande wake katibu wa TALGWU wa mkoa wa Pwani Amina Darabu alisema kuwa chama chao kina lengo la kuwaunganisha wafanyakazi ili waweze kuwa na mahusiano mazuri na mwajiri wao ili kuboresha huduma kwa wateja.

“Tuna sisitiza umoja ujshirikiano na upendo baina ya wanachama pamoja na mwajiri na wateja wanaowahudumia kwani kwa pamoja huduma zitakuwa bora mahali pa kazi,” alisema Darabu.

Awali akifungua mafunzo hayo mwenyekiti wa mkoa Mohamed Mahingika alisema kuwa mafunzo hayo yatawasaidia viongozi hao wapya kujua wajibu na majukumu yao kwa wanachama.

Mahingika aliwataka viongozi hao kuhamasisha watumishi wa serikali za mitaa kujiunga na chama hicho ili kuwa na nguvu ya pamoja katika kuboresha utendaji kazi wao.

Mafunzo hayo ya siku moja yaliwahusisha viongozi kutoka matawi ya Kituo cha  Afya Mkoani sasa Hospitali ya Wilaya ya Kibaha, Kituo cha Afya Mwendapole na kata Kibaha.

Mwisho.

MOTO WATEKETEZA MADUKA 6 MMOJA AJERUHIWA MWINGINE AZIRAI

Na John Gagarini, Kibaha

MFANYABIASHARA  mmoja wa duka la bidhaa mbalimbali Maili Moja wilayani Kibaha mkoani Pwani Urisha Mwembamba amenusurika kifo baada ya kujeruhiwa na moto ambao uliteketeza duka lake na mengine matano.

Moto huo ambao unadaiwa ulitokana na shoti ya umeme ulianzia kwenye jokufu la kuhifadhia vinywaji baridi ambavyo alikuwa akiuza pamoja na bidhaa nyingine viliteketea kabisa.

Akizungumza na mwandishi wa habari hizi mmoja wa wahanga wa tukio hilo Ally Gonzi alisema kuwa tukio hilo lilitokea juzi Novemba 10 majira ya saa 2 usiku

Gonzi alisema kuwa moto huo ulianza majira ya saa 2 usiku na ulianzia kwenye duka hilo na kusambaa kwenye maduka mengine baada ya kushindwa kuudhibiti. 

“Moto ulianzia kwenye duka la Mwembamba kwenye jokofu na wakati moto unaanza alikuwepo kwani aliingia kwa mlango wa dharura lakini alishindwa kutoka akiwa hajui nini cha kufanya huku moto ukiendelea ndipo wasamaria wema wakaingia na kumtoa ambapo alijeruhiwa na moto miguuni,” alisema Gonzi

Alisema kuwa moto ulipokuwa ukiendelea watu walifika na kuanza kujaribu kuzima lakini ulikuwa mkali sana kwani kuna pipa kubwa la maji kama lita 15,000 wakawasha mashine lakini moto huo haukuzimika.

“Dada wa Mwembamba aitwaye Nasra alipopata taarifa akaja kutoka Mbezi naye akazimia kutokana na tukio hilo ambapo wote walikimbizwa hospitali ya Rufaa ya Mkoa ya Tumbi kwa ajili ya matibabu hata hivyo gari la zimamoto lilifika saa moja na nusu baada ya moto kutokea hata hivyo walifika moto huo ukiwa tayari umedhibitiwa na wananchi,” alisema Gonzi.

Aidha alisema waliwasiliana na kikosi cha zimamoto lakini waliambiwa hakuna gari na askari wakuzuia ghasia FFU walifika na kuzuia wizi lakini hata hivyo watu waliiba vitu walipokuwa wakijidai kuokoa.

Akithibitisha kutokea kwa tukio hilo kamanda wa Polisi mkoani Pwani Ulrich Matei alisema kuwa jumla ya maduka sita yaliathirika na moto huo na mtu mmoja alijeruhiwa.

“Polisi ilibidi watumie mabomu ya machozi ili kuwatawanya watu ambapo baadhi yao walikuwa ni vibaka waliokuwa wakijaribu kuiba mali kwenye maduka mengine ya jirani,” alisema Kamanda Matei.

Kamanda Matei alisema kuwa chanzo cha moto huo bado hakijajulikana wala thamani ya mali zilizoteketea bado hakujafahamika na uchunguzi unaendelea aliwataka wananchi kutotumia fursa kuiba yanapotokea majanga kama hayo badala yake watoe msaada.

Mwisho. 

MSAADA WA KISHERIA DC APONGEZA

Na Mwandishi Wetu, Kibaha

MKUU wa wilaya ya Kibaha mkoani Pwani Halima Kihemba amekipongeza kituo cha Msaada wa Kisheria  kwa Wanawake (WLAC) kwa kujitolea kutoa huduma za kisheria bure kwa wananchi wasio na uwezo wa kumudu gharama za kuwalipa wanasheria.

Aliyasema hayo mjini Kibaha wakati akifunga mafunzo ya wasaidizi wa Kisheria wilayani humo ya siku 25 yaliyoandaliwa na Kituo cha Msaada wa Kisheria kwa Wanawake (WLAC).

Kihemba alisema kuwa kituo hicho kimeonyesha umuhimu wa kutoa msaada wa kisheria ni muhimu kwa watu hususani wanawake na watoto ambao wamekuwa wakipoteza haki zao kutokana na baadhi ya watu kutumia unyonge wao wakutokuwa na sauti ndani ya jamii kuwadhulumu haki zao.

“Huduma ya kisehria ni muhimu ndani ya jamii lakini watu wengi wamekuwa wakishindwa kumudu gharama hizo hivyo kushindwa kupata haki zao hivyo mashirika kama haya ni ya kuigwa,” alisema Kihemba.

Aidha alisema kuwa makundi hayo mawili ndiyo yamekuwa yakidhulumiwa haki zao kwa kiasi kikubwa hivyo mashirika kama WLAC yanayojitolea lazima yaungwe mkono na wadau mbalimbali ikiwemo serikali.

Awali akimkaribisha mkuu wa wilaya mkuu wa idara ya Mafunzo ya WLAC Magdalena Mlolere alisema kuwa lengo la kituo hicho ni kuhakikisha kuwa watu wanapata haki zao ambazo ni za msingi na ziko kikatiba.

Mlolere alisema kuwa lengo la kutoa mafunzo hayo kwa wasaidizi wa kiseheria wa vituo vya KPC na KPP ni ili waweze kusaidia wananchi kutatua migogoro inayojitokeza kabla ya kufika kwenye vyombo vya kisheria ikiwemo mahakama na polisi.

“Mafunzo hayo pia yatasaidia kupunguza kesi zinazopelekwa mahakamani ambazo nyingine zimekuwa zikitumia muda mrefu kuamuliwa na kuwafanya wahusika kutumia muda mwingi kwenda mahakamani huku wakishindwa kufanya shughuli zao za maendeleo,” alisema Mlolere.

Akisoma hotuba mbele ya mgeni rasmi moja ya wahitimu wa mafunzo hayo kwa niaba ya wahitimu John Gagarini alisema kuwa changamoto zinavyovikabli vituo hivyo ni baadhi ya wanajamii kutokuwa wawazi katika kuyapeleka mashauri hayo kwenye vituo hivyo pia ni ukosefu wa usafiri wa kuweza kufika kwenye maeneo hasa yale ya vijijini, jumla ya wahitimu 32 walihitimu mafunzo hayo na kukabidhiwa vyeti na mkuu huyo wa wilaya ya Kibaha Halima Kihemba.

Mwisho.

  

UKAWA

Na John Gagarini, Kibaha
CHAMA Cha Mapinduzi (CCM) kimesema kuwa ndoa ya vya ma vya upinzini
vinavyounda Umoja wa Katiba ya Wananchi (UKAWA) si tishio kwani hizo
ni porojo tu na haitaweza kudumu.
Akizungumza kwenye baraza la mkoa la Jumuiya ya Wazazi mkoa wa Pwani
mwenyekiti wa Jumuiya hiyo Jackson Josian alisema kuwa muungano huo
hautaweza kudumu.
Josian alisema kuwa hata wakiungana hawataweza kuisumbua CCM kutokana
na viongozi wao kutokuwa na ushirikiano kwani kila mmoja anaangalia
upande wake.
“Ndoa ya UKAWA haiwezi kudumu kutokana na wapinzani kuwa watu wa
vitisho tu na hawawezi kuongoza hata ndani ya vyama vyao,” alisema
Josian.
Alisema kuwa kipimo kizuri kilikuwa kwenye Bunge Maalumu la Katiba
ambapo walionyesha udhaifu mkubwa kwa kususia ambapo katiba ndiyo
mustakbali wan chi yoyote.
“Wao wanaangalia maslahi ya vyama vyao na si maslahi ya Umma kwani
hata kama walikuwa na hoja za msingi wangepinga wakiwa ndani ya Bunge
na siyo nje hivyo hawa hawafai kupewa madaraka na ndoa yao haitutishi
kwani itavunjika,” alisema Josian.
Kwa upande wake katibu wa CCM Kibaha Mjini Abdala Mdimu alisema kuwa
kipindi hichi ni vita kuelekea uchaguzi wa serikali za Mitaa, Vijiji
na Vitongoji.
Mdimu alisema kuwa kwa sasa chama kiko kwenye mchakato wa kuwapata
wanachama wenye sifa watakaogombea nafasi za uenyekiti wa nafasi hiyo
ambapo kura za maoni zitafanyika Oktoba 30.
Aliwataka wanachama kutowachafua baadhi ya wagombea kwani mamlaka ya
kujua kuwa mgombea fulani hana sifa ni vikao ambavyo vikao vya
kisheria na si mtu kutoa maamuzi.
Mwisho.

MAHIZA AKIMBIA OFISI KUKAMILISHA UJENZI WA MAABARA NA KUKU MILIONI 20 KUNUSURIKA NA KIFO

> Na John Gagarini, Bagamoyo
>
> SUALA la Maabara kwa shule za Sekondari za Kata limeingia kwenye hatua
> nzito baada ya mkuu wa Mkoa wa Pwani Mwantumu Mahiza kuiacha ofisi yake na
> kuhamia Wilaya ya Bagamoyo ili kuhakikisha agizo la Rais Dk Jakaya Kikwete
> la kila wilaya iwe imekamilisha ujenzi huo ifikapo Novemba 30 mwaka huu.
>
> Sambamba na hilo mkuu huyo amewataka wakuu wa idara wa Wilaya hiyo kila
> mmoja kutokaa ofisini na kuchagua kata ya kwenda ili kusimamia ujenzi huo
> hadi ujenzi wa maabara ukamilike.
>
> Akizungumza juzi kwenye kikao cha baraza la Madiwani kilichofanyika mjini
> Bagamoyo Mahiza alisema kuwa ujenzi wa maabara kwenye wilaya hiyo bado
> zoezi hilo haliko vizuri hivyo lazima itumike nguvu ya ziada kufanikisha
> zoezi hilo.
>
> “Kuanzia sasa najua nitaanzia kata gani lakini nahamia Bagamoyo na wakuu wa
> idara kila mmoja tukitoka hapa ataniambia atakuwa kata gani ili tuanze
> usimamizi kwani bila ya kufanya hivi muda utaisha na mambo yatakuwa
> magumu,” alisema Mahiza.
>
> “Kuanzia sasa vikao vya madiwani havitakuwepo kilichobaki wote tuende
> kwenye ujenzi wa maabara na kama mtu anaona hawezi kuwajibika aondoke
> mapema asije akatuharibia mipango yetu ya maendeleo kwani watoto ni wetu,”
> alisema Mahiza.
>
> Mahiza alisema kuanzia sasa hivi hakuna cha mahafali wala sherehe wimbo
> uliopo ni maabara kwa shule zetu za sekondari kwani baadhi ndo wako kwenye
> msingi je ujenzi utakamilika kwa wakati jambo ambalo linatia mashaka.
>
> “Baadhi ya watendaji hawana haraka na kusababisha shughuli kwenda taratibu
> kuanzia sasa hapa ni mwendo wa kufanya kazi kwani tusipokuwa makini muda
> utaisha hatujakamilisha itakuwa haipendezi,” alisema Mahiza.
>
> Aidha alisema kuwa wakuu wa wilaya na mikoa waliitwa Dodoma na Rais na
> kutakiwa wawe wamekamilisha ujenzi huo ifikapo Novemba 30 mwaka huu na wao
> walimwahidi kuwa watakamilisha ujenzi kipindi hicho.
>
> Kwa upande wake mwenyekiti wa Halmashauri ya Bagamoyo Shukuru Mbato alisema
> kuwa agizo hilo wamelipokea na watahakikisha wanakamilisha ujenzi wa
> maabara hizo kwa muda uliopangwa.
>
> Mwisho.

Na John Gagarini, Kibaha

> CHANJO mpya ya ugonjwa wa Mdondo kwa kuku ya ITA NEW itasaidia kupunguza
> vifo vya kuku wa kienyeji zaidi ya milioni 20 wanaokufa kwa mwaka kutokana
> na ugonjwa huo.
>
> Tayari dawa hiyo imeshapitishwa na mamlaka ya vyakula na dawa (TFDA) kwa
> ajili ya matumizi kwa kuku ambapo Tanzania ina jumla ya kuku wapatao
> milioni 60.
>
> Akizungumza mjini Kibaha makamu mwenyekiti wa chama cha waganga waisidizi
> wa mifugo kitaifa (TAVEPA) ambaye pia ni mwakilishi wa kampuni ya madawa ya
> Laprovet Tanzania Ephrahim Massawe alisema kuwa chanjo hiyo ni ya muda
> mrefu.
>
> “Chanjo hiyo inawakinga kuku kwa kipindi cha mwaka mmoja tofauti na chanjo
> nyingine ambazo huisha nguvu kila baada ya miezi mitatu kabla ya kuchanjwa
> chanjo nyingine,” alisema Massawe.
>
> Alisema kuwa ugonjwa huo ni mbaya kwa kuku ambao unaua kuku kwa muda mfupi
> na kusababisha hasara kubwa kwa wafugaji lakini kutokana na kupatikana
> chanjo hii itasaidia kupunguza vifo vya kuku kutokana na ugonjwa huo
> maarufu kama Kideri
>
> “Ugonjwa huo ambao hutokea kwa misimu ya mvua zinapoanza na zinapoishia
> ulikuwa ni tishio kubwa kwa wafugaji kwani ulifikia hatua ya kuua hata nusu
> ya idadi ya kuku wa kienyeji hapa nchini,” alisema Massawe.
>
> Aidha alisema kuwa kupatikana kwa chanjo hiyo kutasaidia kuongeza pato,
> lishe na kukuza uchumi wa kaya ambazo zifafuga kuku hasa vijijini ambapo
> mikoa inayoongoza kwa ufugaji wa kuku hao ni Singida, Dodoma, Shinyanga na
> Morogoro.
>
> Mwisho.
>