BARABARA YATENGEWA BILIONI MUFINDI KASKAZINI

Na John Gagarini, Iringa

BARABARA ya Kinyanambo C hadi Kisusa yenye urefu wa kilometa 131kwenye Jimbo la Mufindi Kaskazini wilaya ya Mufindi mkoani Iringa imetengewa kiasi cha shilingi billioni 1.2 kwa ajili ya matengenezo ya kawaida.

Hayo yalisemwa na Mbunge wa Jimbo la Mufindi Kaskazini Mahmoud Mgimwa wakati akizungumza na wananchi wa Kijiji cha Mpanga Tazara akielezea juu ya kukabiliana na changamoto ya barabara katika Jimbo hilo.

Mgimwa alisema kuwa fedha hizo zimetengwa katika kipindi cha bajeti ambayo imeanza mwezi huu na tayari ujenzi wa barabara hiyo umeshaanza kwa kuweka makalavati ikiwa ni hatua za mwanzo za ujenzi huo.

“Barabara hii tayari imeshakabidhiwa Wakala wa Barabara Nchini (TANROADS) mkoa kutoka Halmashauri ya mji wa Mafinga hali ambayo sasa imeipandisha hadhi hivyo itakuwa kwenye mikakati ya kuwekewa lami kupitia kampuni ya (MCC),” alisema Mgimwa.

Alisema kuwa matengenezo hayo yataboresha ubora wa barabara hiyo ambayo ni tegemeo na kuifanya kupitika wakati wote bila ya usumbufu na kurahisisha mawasiliano kwa wananchi na kwa wakulima ili waweze kupeleka mazao yao kwenye masoko baada ya kuvuna.

“Barabara hii ambayo inapita kwenye maeneo ya Itimbo, Ihalimba, Usokamu, Mapanda na Kisusa itakuwa ni moja ya barabara amabzo ziko kwenye mpango wa kuboreshwa na baada ya kupandishwa hadhi halmashauri itapata unafuu ambapo fedha ambazo zingetumika kuitengeneza sasa zitatumiwa kwenye shughuli nyingine za maendeleo,” alisema Mgimwa.

Aidha alisema kuwa barabara nyingine ni Kinyanambo A yenye urefu wa kilometa 151 ambayo inapita maeneo ya Msavanu, Mkombavanu, Sadani na Madibila nayo ujenzi wake tayari umeanza.

Pia alisema kuwa barabara ya Johns Corner yenye urefu wa kilometa 107 tayari imejengwa kwa kiwango cha lami urefu wa kilometa tano nab ado ujenzi wake unaendelea.

Alibainisha kuwa barabara hiyo inapita kwenye maeneo ya Mtili, Ifwagi, Mdabulo, Ihanu, Lulanga hadi Mpanga Tazara iko kwenye mpango wa kupandishwa hadhi ili ichukuliwe na (TANROADS), na barabara ya Mpanga Tazara hadi Mlimba ambayo imetengwa kiasi cha shilingi milioni 800.

“Barabara ya Mpanga Tazara hadi mlimba kwani inaunganisha wilaya mbili za Mufindi na Kilombero ni muhimu sana kwa ajili ya kurahisisha usafiri kwa wakulima kupeleka mazao yao kwenye masoko ambayo yana bei nzuri kama vile Makambako, Kilombero, Mbeya na Dar es Salaam,” alisema Mgimwa.

Mgimwa alisema kuwa barara nyingine ziko kwenye mchakato wa kuwapata makandarasi kwa ajili ya kuanza ujenzi katika bajeti inayoanzia mwezi huu wa Julai.

Mwisho.

Na John Gagarini, Iringa

JIMBO la Mufindi Kaskazini wilayani Mufindi mkoani Iringa linahitaji Transfoma 60 ili kukabiliana na changamoto ya ukosefu wa umeme kwenye kata tatu za Mpanga Tazara, Ikwea na Ikongosi.

Changamoto hiyo ya ukosefu wa umeme iko kwenye kata hizo kati ya kata 13 za Jimbo hilo ambapo upatikanaji wa Transfoma hizo utasaidia kuondoa kabisa ukosefu wa nishati hiyo kwa baadhi ya vitongoji.

Akizungumza na waandishi wa habari juu ya changamoto kwenye Jimbo la Mufindi Kaskazini, Mbunge wa Jimbo hilo Mahmoud Mgimwa alisema kuwa kwa sasa mchakato wa kutafuta Transfoma unaendelea.

“Thamani ya Transfoma moja ni kati ya shilingi milioni 40 na 60 na tunaendelea kuhakikisha vinapatikana ili kuondoa kabisa tatizo la umeme ndani ya jimbo letu lakini eneo kubwa tayari wanapata umeme,” alisema Mgimwa.

Alisema kuwa anaamini kuwa umeme utapatikana muda si mrefu na kuwataka wananchi kutokuwa na wasiwasi juu ya upatikanaji wa nishati hiyo muhimu ya umeme.

Aidha alisema kuwa maeneo mengi kwa sasa yanapata umeme hadi vijijini na sehemu chache zilizobaki tatizo hilo litakwisha na jitihada zinaendelea ili kufanikisha suala hilo.

Mwisho.    

CHANGAMOTO BVR ZAIBUKA KIBAHA

Na John Gagarini, Kibaha

ZOEZI la uandikishaji Daftari la Kudumu kutumia mfumo mpya wa (BVR) wilayani Kibaha mkoani Pwani limekumbwa na changamoto ikiwemo wananchi kutumia muda mwingi kuandikishwa.

Baadhi ya wakazi wa mtaa wa Ungindoni Kata ya Kongowe waliozungumza na Wapo Radio leo wamesema kuwa zoezi hilo linakwenda taratibu sana kutokana na waandikishaji.

Wananchi hao ambao ni Leonard Mhina na Seleman Kumchaya wamesema kuwa wanasiku mbili lakini hadi leo siku ya tatu bado hawajafanikiwa kuandikishwa.

Kwa upande wake mwenyekiti wa Mtaa wa Ungindoni Juma Njwaka amesema kuwa wananchi wanaoshindwa kuandikishwa ni wale ambao wanashindwa kufuata utaratibu.

Naye Ofisa Mtendaji wa Mtaa huo wa Ungindoni Magesa Lukale amesema kuwa maopareta wa mashine hizo wanafanya kazi vizuri labda tatizo ni kwa wazee ndiyo wanaochukua muda mrefu kutokana na kujieleza.

Mwisho.

WATU ZAIDI YA MILIONI 11 WAANDISKISHWA DAFTARI LA KUDUMU LA WAPIGA KURA NCHINI

Na John Gagarini, Msoga

JUMLA ya watu milioni 11,248,194 wameandikishwa kwenye daftari la kudumu la wapiga kura zoezi ambalo linaendelea kwa sasa hapa nchini likiwa limeingia mkoani Pwani.

Hayo yalisemwa leo kwenye Kijiji cha Msoga kata ya Msoga wilayani Bagamoyo na mwenyekiti wa Tume ya Uchaguzi ya Taifa Damian Lubuva alipokuwa anampa taarifa Rais Dk Jakaya Kikwete mara baada ya kujiandikisha.

Lubuva alisema kuwa malengo ni kuandikisha watu milioni 21 hadi 23 kote nchini mara zoezi hilo litakapokamilika kati ya Julai mwishoni au Agosti mwanzoni kama hakutatokea matatizo.

“Hadi sasa ni mikoa 11 inaendelea na zoezi ambayo ni Mwanza Shinyanga, Geita, Simiyu, Mara, Manyara, Arusha, Kilimanjaro Morogoro na jana ulianza mkoa wa Pwani,” alisema Lubuva.

Aidha alisema kuwa changamoto zilizojitokeza ni za kawaida hasa kutokana na mfumo huu kuwa ni mpya kwani kila jambo jipya lina changamoto zake.

“Mfumo huu ni mpya hivyo lazima kuwe na changamoto za hapa na pale lakini zoezi linakwenda vizuri na tunaamini kuwa tutafanikiwa kama tulivyopanga,” alisema Lubuva.

Mkoa wa Pwani una jumla ya vituo 1,752 na mashine za BVR 932 ambapo kata ya Msoga kuna jumla ya vituo 17 zoezi hilo kwa mkoa wa Pwani lilianza jana na litamalizika Julai 20.   

Mwisho.

   

RAIS KIKWETE AJIANDIKISHA DAFTARI LA KUDUMU ATAKA WANANCHI WAJITOKEZE KWA WINGI

Na John Gagarini, Msoga

RAIS Dk Jakaya Kikwete amewataka Watanzania kujitokeza kwa wingi kujiandikisha kwenye Daftari la Kudumu la Mpiga Kura kwani ni haki ya  Kikatiba kwa kila mwananchi mwenye sifa.

Aliyasema hayo jana kwenye Kijiji cha Msoga kata ya Msoga wilaya Bagamoyo mkoani Pwani wakati alipojiandikisha kwenye Daftari la Kudumu la Mpiga kura na kusema kuwa amefurahi kutimiza haki yake.

Dk Kikwete alisema kuwa kwa kujiandikisha huko kutamsaidia mwananchi kuchagua kiongozi anayempenda na si baadaye kulalamika kuwa kiongozi fulani hafai.

“Mimi tayari nimeshapata kitambulisho cha kuweza kumchagua Rais wangu, Mbunge wangu na Diwani wangu kama mtu humtaki mnyime kura kwa kumpigia umtakaye,” alisema Dk Kikwete.

Aidha aliipongeza Tume ya Uchaguzi kwa kuendelea kupambana kuhakikisha zoezi hilo linafanikiwa licha ya kuwa na maneno mengi kazi yenu ni nzuri na tunaithamini.

“Chapeni kazi changamoto ni kawaida na ni sehemu ya maisha na mtakaposhindwa tuambieni kwani kazi yenu ni nzuri na tunaithamini sana chapeni kazi,” alisema Dk Kikwete.

Kwa upande wake mwenyekiti wa Tume ya Uchaguzi nchini Damian Lubuva alisema kuwa licha ya changamoto zilizojitokeza lakini zoezi linakwenda vizuri na matarajio ni makubwa ya kulifanikisha.

Lubuva alisema kuwa hadi sasa mikoa 13 tayari imeshakamilisha zoezi hilo ambapo changamoto inatokana na mfumo mpya wa BVR na tayari watu zaidi ya m 11 wameshaandikishwa.

“Malengo ni kuandikisha watu m 21 hadi 23 mara litakapokamilika mwishoni mwa Julai au Agosti mwanzoni kama mambo yatakwenda vizuri,” alisema Lubuva.

Mkoa wa Pwani una jumla ya vituo 1,752 na mashine za BVR 932 ambapo kata ya Msoga kuna jumla ya vituo 17 zoezi hilo kwa mkoa wa Pwani lilianza jana na litamalizika Julai 20.   

Mwisho.

MAJAMBAZI YAUA ASKARI YATOKOMEA NA FEDHA

Na John Gagarini, Kibaha

WATU zaidi ya watano wanaosadikiwa kuwa ni majambazi wamevamia benki ya NMB tawi la Mkuranga,mkoani Pwani na kufanikiwa kuua askari mmoja na kujeruhi watu watatu kisha kupora fedha kiasi ambacho hakijafahamika.

Majambazi hayo walifanikiwa kumuua askari huyo aliyekuwa kavaa kirai kwa kumpiga risasi kichwani baada ya mapambano ya kurushiana risasi.

Askari aliyefariki dunia alitajwa kwa jina la PC Alfred ambaye hakuwa kazini bali alikwenda katika benki hiyo kufuata huduma na kati ya waliojeruhiwa ni pamoja na PC James.

Tukio hilo limetokea mapema leo, baada ya watu hao kufika katika benki hiyo na kuanza kuwashambulia askari wanaolinda katika benki hiyo.

Kwa mujibu wa mashuhuda walielezea kuwa baadaye watu hao walihamia katika gari lililokuwa linapeleka fedha benki na kuchukua fedha zote kisha kuchukua silaha mbili aina ya SMG na kutokomea kusikojulikana.

Aidha inasadikiwa watu hao walifika katika benki hiyo wakiwa na pikipiki tatu aina ya boksa wakiwa wamebebana mshikaki na walipofanikisha tukio hilo waliondoka.

"Majambazi hayo yalipofika eneo la tukio walianza kufanya mashambulizi kwa askari ambapo walifanikiwa kuwadhibiti askari waliokuwepo kwa kuanza kuwashambulia na kupiga risasi hewani"alisema mmoja wa mashuhuda hao.

Alielezea kuwa  askari waliokuwepo eneo la tukio walikimbia na kumuacha mmoja kupambana nao ambapo alizidiwa.

Aidha alieleza kuwa dakika chache baada ya mashambulizi hayo liliingia gari lililobeba fedha ambapo walivamia gari hilo bila kuwepo kwa mtu yeyote na kufanikiwa kubeba  fedha zote.

Kamanda wa Polisi Mkoa wa Pwani,ACP Jafari Ibrahim alithibitisha kutokea kwa tukio hilo na kuahidi kutoa taarifa kamili mara atakapopata taarifa hizo.

Mwisho

REJESHENI HESHIMA YA RIADHA BALOZI ALI IDD

Na John Gagarini, Kibaha

WANARIADHA wa Tanzania wametakiwa kujiandaa kimataifa zaidi ili kuiletea heshima nchi kama ilivyokuwa miaka ya 70 ambapo Tanzania ilikuwa ikitamba kimataifa na kuipeperusha vema bendera ya Taifa.

Hayo yalisemwa juzi mjini Kibaha na makamu wa pili wa Rais Zanzibar Balozi Seif Ali Idd wakati akifunga mashindano ya riadha ya Taifa ya 54 kwenye viwanja vya Filbert Bayi na kusema kuwa kwa sasa mchezo huo umedorora.

Balozi Idd alisema kuwa wanariadha hao wanapaswa kuweka malengo ya kushindana kimataifa na si kuridhika na kukimbia hapahapa nchini kwani nafasi ya kufanya vizuri kimatiafa bado ipo kinachotakiwa ni kuwekwa mipango mizuri.

“Miaka ya nyuma kulikuwa na wakimbiaji wengi wazuri ambao walikuwa wakikimbia kimataifa na kuiletea sifa nchi yetu na sasa tunapaswa kulenga kimataifa zaidi kwani inasiadia kuitangaza nchi yetu kama ilivyo kwa wenzetu ambao ni majirani zetu Kenya ambao kwa sasa wanatamba kwenye mchezo huo,” alisema Balozi Idd.

Alisema miaka ile kulikuwa na akina Filbert Bayi, Suleiman Nyambui, Juma Ikangaa na wengi waliweka historia ya nchi duniani kwa kufanya vyema kwenye mashindano ya kimataifa hata wakati huu bado nafasi ipo ya kufanya hivyo.

“ Fanyieni kazi Kisayansi mapungufu yaliyojitokeza hadi kusababisha tushindwe kufanya vema katika mashindano ya kimataifa pia wekeni malengo ya muda mfupi na muda mrefu hasa kwa mashindano ya Kimataifa yajayo ili kuweza kurejesha heshima ya mchezo huo kwa Taifa letu,” alisema Idd.

Aidha alisema kuwa serikali zote zimekuwa zikifanya kazi kubwa ya kuwekeza kwenye michezo ambapo hali hiyo imefanya Muungano uendelee kudumu na kujenga mshikamano baina ya Watanzania na zitaendelea kusaidia sekta hiyo ya michezo.

Awali akimkaribisha mgeni rasmi rais wa Shirikisho la Riadha Tanzania RT Antony Mtaka alisema kuwa moja ya changamoto inayowakabilini na kukosa mdhamini wa moja kwa moja hali ambayo inasababisha maandalizi ya mashindano kuwa mabaya.

Mtaka ameiomba serikali kuwasaidia wanariadha wa zamani wanaoanzisha shule za Michezo ili waweze kufungua shule nyingi kwa lengo la kuinua michezo hapa nchini kwnai uwekezaji unapaswa kuanzia ngazi ya chini.

Mwisho.

Na John Gagarini, Kibaha

NAIBU Waziri wa Habari Vijana Utamaduni na Michezo Juma Nkamia amewataka viongozi wa timu mbalimbali kuhakikisha wanapeleka wanamichezo kwenye mashindano badala ya kupeleka viongozi jambo ambalo linafanya timu hizo zisiweze kufanya vizuri.

Waziri Nkamia aliyasema hayo juzi mjini Kibaha wakati wa kufunga michezo ya Taifa ya Riadha ya 54 kwenye viwanja vya shule ya Filbert Bayi na kusema kuwa baadhi ya timu zilipeleka viongozi badala ya wachezaji.

Alisema kuwa ni vema wachezaji wakapewa nafasi zaidi kwani wao ndiyo wanaokwenda kushindana na viongozi wao wanasimamia masuala ya kiutawala lakini fursa kubwa iwe kwa wachezaji ili kutimiza malengo yao.

“Hapa kwenye mashindano hayo tumesikia kuna timu wamekuja viongozi ni vema nafasi hiyo wakapewa wachezaji ili washindane na si kuleta viongozi ambao hawatashiriki kwa hiyo ushiriki wa timu hiyo haupo,” alisema Waziri Nkamia.

Aidha alisema kuwa mchezo huo unapaswa kuwekewa mikakati ya kuboreshwa ili uweze kurudia kwenye hadhi yake ya zamani ambapo Tanzania ilikuwa ikitamba vilivyo na kuiletea sifa kubwa nchi lakini kwa sasa hali ni tofauti.

Aliwataka wanariadha kuongeza jitihada ili waweze kufikia viwango vitakavyowafanya waweze kushiriki mashindano ya Kimataifa na kuleta medali kama walivyofanya wanariadha wakongwe ambao rekodi za kimataifa hadi leo zimedumu.

Mwisho.

Na John Gagarini, Kibaha

SERIKALI imeombwa kupunguza ushuru wa vifaa vya michezo ili kusaidia malengo ya uanzishwaji wa shule na vituo vya michezo kuinua vipaji vya vijana wadogo ili waje kuwa wachezaji watakaotegemewa na Taifa.

Akizungumza wakati wa ufungaji wa michezo ya Riadha ya Taifa mjini Kibaha mkurugenzi wa shule za Filbert Bayi Ana Bayi alisema kuwa ushuru wa vifaa hivyo vya michezo ni mkubwa sana hivyo azma ya kukuza vipaji kushindwa kufikiwa.

Bayi alisema kuwa uwekezaji kwenye michezo hususani kwa vijana wadogo wakiwemo wanafunzi ndiyo chimbuko la wanamichezo tofauti na sasa ambapo wachezaji wengi hawajaanzia kwenye shule au vituo vya michezo.

“Wachezaji wote wanaotamba sehemu mbalimbali duniani walianzia kwneye shule au vituo vya michezo hivyo ili na sisi tuweze kufanikiwa lazima tuwekeze kwa watoto ili wakue kwenye michezo na si kuanza kuwafundisha ukubwani lakini tunakwazwa na ushuru mkubwa wa vifaa vya michezo ,” alisema Bayi.

Alisema kuwa wao kama wanamichezo waliamua kuwekeza kwa kujenga viwanja vya kisasa vya michezo yote nab ado wanendelea na ujenzi lakini vifaa vinavyotumiwa na wanamichezo vina ushuru mkubwa ambapo hata baadhi ya wanamichezo wamekuwa wakishiriki peku peku.

“Tunapokwenda kwenye michezo mbalimbali hasa kwenye nchi zilizojuu kimichezo tunaumia sana kwani wenzetu wamewekeza kwa vijana wadogo na mafanikio ya uwekezaji huo yanaonekana kwani wanafanya vizuri sana,” alisema Bayi.

Aidha alisema kuwa fedha wanazotumia kwa ajili ya ujenzi wa viwanja ni mikopo hivyo serikali iangalie namna ya kupunguza ushuru ili waweze kuweka vifaa ambavyo ni vya kisasa ambavyo vitawafanya wachezaji kutoshangaa wanapokwenda kwenye michuano ya kimataifa kwani wataona vifaa hivyo na mazingira ya viwanja ni ya kawaida.

Akijibu suala hilo Makamu wa Pili wa Rais wa Zanzibar Seif Ali Idd alisema kuwa ataongea na Waziri wa Fedha ili kuangalia namna ya kuwawasidia wanamichezo ili kuwapunguzua gharama kubwa za ushuru wa vifaa hivyo vya michezo.

Makamu wa Rais alimpongeza Filbert Bayi kwa kuanzisha shule ya michezo ambayo itajibu tatizo kubw ala kuandaa vijana kwa ajili ya kuwa wachezaji wazuri watakaorudhisha hadhi ya michezo hapa nchini ikiwemo riadha.

Mwisho.

Na John Gagarini, Kibaha

IMEELEZWA kuwa uwekezaji kwenye sekta ya michezo kwa michezo ya mchezaji mmoja mmoja inaweza kuinua sekta hiyo kwa haraka tofauti na michezo inayoshirikisha wachezaji wengi.

Hayo yalisemwa mjini Kibaha na msiadizi wa mbunge wa Jimbo la Kibaha Mjini Silvestry Koka, Method Mselewa wakati wa tamasha la mchezo wa Karate lililoandaliwa na klabu ya KAMBOJI ya wilayani Kibaha na kushirikisha wachezaji toka mikoa ya Dar es Salaam, Morogoro na Pwani.

Mselewa alisema kuwa wachezaji wanaocheza michezo ya mchezaji mmoja wana uwezo wa kufanya vyema endapo wataandaliwa vizuri kushiriki michezo hiyo kama ilivyo kwa michezo kama ya ngumi, kareti, riadha, tenisi, michezo ya mitupo na michezo mingine ambayo inashirikisha mchezaji mmoja.

“Hatusemi kuwa michezo inayoshirikisha wachezaji wengi haina nafasi ya kufanya vizuri bali kuna haja ya michezo ya mtu mmoja mmoja nayo kupewa nafasi kwani inaonyesha kuwa ndiyo iliyowahi kufanya vema kimataifa,” alisema Mselewa.

Alisema kuwa mfano wa michezo ya ngumi na riadha kwa miaka ya nyuma ilifanya Tanzania itambuliwe duniani ambapo wachezaji wake walifanikiwa kutwaa medali mbalimbali kwenye michuano kama ile ya Jumuiya ya Madola, Olimpiki na michezo ya kimataifa.

“Tunapaswa kueiendeleza michezo yote lakini pia kuwekeza kwenye michezo kama hii itasaidia nchi kuwa kwenye ramani ya michezo ambapo tumeona uwekezaji kwenye michezo ya watu wengi licha ya kusaidiwa lakini bado mafanikio hayajaonekana,” alisema Mselewa.

Kwa upande wake mwenyekiti wa klabu hiyo ya Kamboji Kachingwe Kaslenge alisema kuwa wanakabiliwa na changamoto mbalimbali ikiwa ni pamoja na kutokuwa na ofisi pamoja na sehemu yao binafsi ya kufanyia mazoezi ambapo kwa sasa wanaomba.

Kaselenge alisema kuwa changamoto nyingine ni ukosefu wa vifaa kutoakana na vifaa kuuzwa kwa gharama kubwa hivyo wachezaji wengi kushindwa kuvinunua kutokana na bei kuwa juu ambapo wakati mwingine mchezjai hujikuta na kifaa kimoja kwa ajili ya mazoezi na mashindano.

Mwisho.

HABARI MPYA

Na John Gagarini, Kibaha

ZOEZI la kuandikisha wananchi kwenye Daftari la Kudumu la Wapiga Kura mkoani Pwani linatarajiwa kuanza Juni 14 mwaka huu kwa watu wenye sifa wakiwemo wale waliokuwa na umri chini ya miaka 18 wakati zoezi hilo lilipofanyika miaka ya nyuma.

Akizungumza na waandishi wa habari mjini Kibaha mchambuzi wa mfumo wa kompyuta wa Tume ya Taifa ya Uchaguzi Mariam Rajab alisema kuwa zoezi hilo litadumu kwa kipindi cha siku 28 kwenye maeneo yote ya mkoa huo.

Rajab alisema kuwa zoezi hilo ni kwa watu wote wenye sifa wakiwemo wale wenye umri kuanzia miaka 18 na kuendelea ambao ni raia wa kuzaliwa au kuandikishwa kisheria.

“Zoezi hili ni muhimu kwa wananchi hivyo wanapaswa kujitokeza kwa wingi ili waweze kujiandikisha kwa lengo la kupata fursa ya kupiga kura kwenye uchaguzi mkuu wa mwaka huu,” alisema Rajab.

Alisema kuwa zoezi hili litawahusisha hata wale ambao walijiandikisha kwenye daftari hilo kabla ya uchaguzi mkuu uliopita kwani vitambulisho hivyo havitatumika tena ambapo uchaguzi huu utatumia vitambulisho vipya.

“Tunawashauri wananchi wajitokeze kwa wingi kwenye uandikishaji huu kwani endapo hawataandikishwa watakosa fursa ya kupiga kura ambayo ni haki yao ya msingi,” alisema Rajab.

Aidha alisema Tume imeshaleta vifaa kwa ajili ya zoezi hilo na hakutakuwa na tatizo la vifaa kwa ajili ya kujiandikisha kama ilivyotokea kwa baadhi ya mikoa kuwa na upungufu wa vifaa.

“Changamoto mbalimbali ambazo tulizipata wakati wa zoezi hili kwenye ile mikoa ya awali tayari zimefanyiwa kazi hivyo wananchi wasiwe na wasiwasi juu ya vifaa kikubwa ni kushiriki kwa wingi,” alisema Rajab.

Alisema kuwa tayari maofisa wa uchaguzi kwenye mkoa huo wameshapatiwa mafunzo kwa ajili ya kutumia mashine zitakazotumika kuandikishia BVR na kinachosubiriwa ni muda kufika.

Mwisho.

Na John Gagarini, Kisarawe

SHIRIKA la Kuhifadhi Misitu ya Asili Tanzania (TFCG) limeanzisha mitandao kwa ajili ya ulinzi wa misitu hiyo ili kukabiliana na uharibifu unaofanywa na watu wanaotumia mazao ya misitu kwa ajili ya kujipatia kipato.

Hayo yalisemwa wilayani Kisarawe na mratibu wa shirika hilo Yahaya Mtonda wakati wa sherehe za kuwapa zawadi washindi wa Insha juu ya umuhimu wa misitu zilizoambatana na siku ya mazingira duniani.

Mtonda alisema kuwa TFCG imehamasisha kuanzishwa kwa mitandao ipatayo 93 ijulikanayo kwa kifupi (MJUMITA).

“Mbali ya mitandao hii kulinda misitu hiyo pia tumewawezesha wananchi wanaozunguka misitu hiyo kuanzisha vyama vya kuweka na kukopa (Vicoba) ili waweze kukopeshana ili kufanya shughuli nyingine za kujiongezea kipato badala ya kutegemea misitu kama chanzo chao cha mapato,” alisema Mtonda.

Mtonda alisema kuwa pia wamewapatia mafunzo walimu wanaofundisha masomo yahusuyo utunzaji wa mazingira ili kuwa na uelewa juu ya masuala ya kuhifadhi mazingira ili wawafundishe wanafunzi wa shule za msingi.

“Tunatoa mafunzo kwa walimu wa shule za msingi ili kuwarithisha wanafunzi tangu wakiwa wadogo waweze kuona umuhimu wa tangu wakiwa wadogo misitu ili waweze kuitunza na kuhamasisha jamii kupanda miti,” alisema Mtonda.

Aidha alisema kuwa lengo la kuwafundisha ni kuwafanya wawe mabalozi wazuri wa kulinda misitu na kutunza mazingira ambayo yamekuwa yakiharibiwa kwa kasi na waharibifu wa mazingira.

Juu ya Insha alisema ilikuwa ni kuataka kujua uelewa wa wanafunzi kutoka shule nane kutoka wilaya za Ilala, Temeke, Kinondoni, Kibaha Mjini, Kibaha Vijijini na Kisarawe ambapo Januari Eric wa Shule Msingi Mtamba alijinyakulia 100,000, Catherine Mbelwa wa Kongowe 70,000 na Prisca Joseph wa Soga 50,000.

Mwisho.  

Na John Gagarini, Kisarawe

WAKALA wa Misitu Tanzania (TFS) wilaya ya Kisarawe mkoani Pwani unatarajia kubadilisha sehemu ya msitu wa Pugu kuwa sehemu ya Utalii na kuwa hifadhi asilia kutokana na vivutio vilivyopo kwenye msitu huo ambavyo baadhi havipo sehemu yoyote duniani.

Hayo yalisemwa na meneja wa (TFS) wilaya ya Kisarawe Andrew Mwenuo alipozungumza na mwandishi wa habari hizi wilayani humo.

Mwenuo alisema kuwa kwa sasa tayari wameshaweka baadhi ya maeneo kwa ajili ya watu kupumzika na njia za kutembea kwa miguu na baiskeli ili watu waweze kuutembelea msitu huo na kuona mandhari na vivutio vilivyopo.

“Kuna wanyama wadogo wadogo akiwemo aina ya nyani mwenye aibu kwani amuonapo mtu huficha uso wake kwa aibu na hawapatikani sehemu nyingine yoyote duniani zaidi ya hapa,” alisema Mwenuo.

Alisema kuwa mbali ya nyani huyo pia kuna aina ya tembo mdogo ambao sehemu nyingine hapatikani zaidi ya kwenye msitu huu pia kuna wanyama wengine, ndege, wadudu kama vipepeo na wengine ambao ni vivutio.

“Hii itakuwa fursa kwa Watanzania na raia wan je ambao wanataka kupumzika na kuona mazingira mazuri ya msitu wakiwemo wasafiri wanaotumia njia ya ndege wanaweza kuja hapa na kupumzika wakisubiri muda wa kuondoka kwa njia ya anga kwani ni jirani na uwanja wa ndege,” alisema Mwenuo.

Aidha alisema kuwa watu wataruhusiwa kuweka mahema na kupumzika na kujipumzisha huku wakila vyakula pamoja na vinywaji ambapo kiingilio kitakuwa kwa wageni ni dola 10 huku kwa Watanzania ni 1,500 huku wanafunzi wakitozwa 500.

Mwisho.